Apple компани хиймэл оюунд суурилсан Siri туслахтай, ухаалаг гэрийн төхөөрөмжүүдийг нэг дор удирдах “HomeView” нэртэй шинэ бүтээгдэхүүнээ 2026 оны аравдугаар сарын 13-нд танилцуулжээ.
Долоон инчийн дэлгэцтэй уг төхөөрөмж нь гэр бүлийн зургаа хүртэлх гишүүний царай болон дуу хоолойг таньж, хэрэглэгч бүрд тохирсон мэдээлэл, үйлчилгээг санал болгох боломжтой гэж Apple мэдээлсэн байна.
Гэрийн төхөөрөмжүүдийг дуу хоолойгоор удирдана
“HomeView” нь хэрэглэгчийн мессежээс хэрэгтэй мэдээлэл хайх, худалдан авах зүйлсийн жагсаалт гаргах зэрэг өдөр тутмын үйлдлийг гүйцэтгэнэ.
Мөн дараах ухаалаг төхөөрөмжүүдийг Siri-ээр дамжуулан удирдах боломжтой аж.
- Гэрэлтүүлэг
- Халаалтын систем
- Хаалганы түгжээ
- Бусад нийцтэй ухаалаг гэрийн төхөөрөмжүүд
iPhone-ийн мэдээллийг ашиглан илүү тохирсон хариулт өгнө
Apple-ийн мэдээлснээр, “HomeView” нь хэрэглэгчийн iPhone дээрх мэдээллийг ашиглан асуултад илүү оновчтой, хувьчилсан хариулт өгөх боломжтой байна.
Харин хувийн мэдээллийг төхөөрөмж дээр хадгалахгүй бөгөөд хэрэглэгчийн нууцлалыг өндөр түвшинд хамгаална гэж компани онцолжээ.
299 ам.долларын үнээр худалдаанд гарна
Apple “HomeView”-ийг 299 ам.долларын үнээр арваннэгдүгээр сарын 13-наас худалдаалж эхлэхээр төлөвлөсөн байна.
Тус компани шинэ бүтээгдэхүүнээрээ Amazon болон Google-ийн ухаалаг гэрийн төхөөрөмжүүдтэй өрсөлдөхөөр зорьж байгаа аж.
