Монгол Улсын Ерөнхийлөгч Ухнаагийн Хүрэлсүх Өвөрхангай аймагт ажиллах үеэрээ иргэд, төрийн албан хаагчидтай уулзаж, улс орны нийгэм, эдийн засгийн нөхцөл байдал болон Ерөнхийлөгчийн санаачилсан үндэсний хөдөлгөөн, хөтөлбөрүүдийн хэрэгжилтийн талаар мэдээлэл өглөө.
Ерөнхийлөгч, Зэвсэгт хүчний Ерөнхий командлагч У.Хүрэлсүхийг Монгол Улсын баатар Л.Аюушийн нэрэмжит талбайд хүрэлцэн ирэхэд Өвөрхангай цэргийн хүрээний хүндэт харуул угтан авчээ.
Эдийн засгийн үзүүлэлтүүдийг танилцуулав
У.Хүрэлсүх уулзалтын үеэр Монгол Улсын эдийн засаг 6.8 хувиар өсөж, нэг хүнд ногдох дотоодын нийт бүтээгдэхүүн 7,000 ам.доллар давсан талаар дурдав. Мөн уул уурхайн бус экспорт, хөрөнгө оруулалт нэмэгдэж, гадаад валютын нөөц 8.9 тэрбум ам.долларт хүрсэн, 745 мянган тонн үр тариа, ургац хураан авсныг онцолсон байна.
Эдгээр үр дүнд Өвөрхангай аймгийн төр, захиргааны байгууллага, хувийн хэвшил, баялаг бүтээгчид, иргэдийн оролцоо байсныг Ерөнхийлөгч тэмдэглэжээ.
Тэрбээр гадаад харилцааны талаар ярихдаа 21 улсын төрийн тэргүүн Монгол Улсад айлчилж, улсын нэр хүнд олон улсын тавцанд өсөж байгааг онцолсон байна.
“Хүнсний хувьсгал”, “Цагаан алт”-ын үр дүнг дурдав
“Хүнсний хувьсгал” хөдөлгөөний хүрээнд улсын хэмжээнд 53 хүнсний үйлдвэр шинээр ашиглалтад орж, 1,000 гаруй нэр төрлийн шинэ бүтээгдэхүүн зах зээлд нийлүүлдэг болжээ.
Өвөрхангай аймгийн 51 аж ахуйн нэгж 5 орчим тэрбум төгрөгийн хөнгөлөлттэй зээл авч, үйлдвэрлэлийн хүчин чадлаа нэмэгдүүлэн, шинэ ажлын байр бий болгосон байна. Аймгийн боловсруулах аж үйлдвэрийн бүтээгдэхүүний хэмжээ 2022 онд 25 тэрбум төгрөг байсан бол 2025 онд 28 тэрбум төгрөг давжээ.
“Цагаан алт” хөтөлбөрийн хүрээнд Монгол Улсын самнасан ноолуурын экспорт тав дахин өсөж, 330 сая ам.долларт хүрсэн байна. Өвөрхангай аймгийн ноос, арьс шир боловсруулах үйлдвэрүүд сүүлийн дөрвөн жилд:
- 9 мянган тонн ноос,
- 500 тонн ноолуур,
- 600 мянган богийн арьс,
- 62 мянган үхрийн шир
боловсруулан дотоод, гадаадын зах зээлд нийлүүлжээ.
Дөрвөн сая гаруй мод тарьжээ
“Тэрбум мод” үндэсний хөдөлгөөний хүрээнд Өвөрхангай аймагт 4 сая гаруй мод тарьж, ногоон байгууламжийг нэмэгдүүлсэн байна. Мөн 22 мод үржүүлгийн газар жилд нийт 7 сая тарьц, суулгац бэлтгэх хүчин чадалтай болжээ.
Аймгийн удирдлагууд Ерөнхийлөгчийн санаачилсан үндэсний хөдөлгөөн, хөтөлбөрүүд эдийн засаг, боловсрол, эрүүл мэнд, хүнс, хөдөө аж ахуй, байгаль орчин болон хувийн хэвшлийн хөгжилд хувь нэмэр оруулж байгааг тэмдэглэсэн байна.
21 улсад 1,355 оюутан суралцаж байна
“Ерөнхийлөгчийн илгээлт-2100” тэтгэлэгт хөтөлбөрийн хүрээнд 21 улсад 1,355 оюутан суралцаж байгаагаас 40 гаруй нь Өвөрхангай аймгийн оюутан аж.
Тэдний нэг Э.Мөнхжаргал Польш Улсад суралцаж төгсөөд, өдгөө Өвөрхангай аймгийн Засаг даргын Тамгын газарт ажиллаж байгаа талаар уулзалтын үеэр танилцуулжээ.
“XXI зуун эдийн засгийн аюулгүй байдлын зуун байх ёстой”
Ерөнхийлөгч У.Хүрэлсүх XX зууныг Монгол Улсын тусгаар тогтнолын зуун байсан бол XXI зуун эдийн засгийн аюулгүй байдлаа баталгаажуулсан зуун байх ёстой гэж үзэж байгаагаа илэрхийлэв.
Тэрбээр эрчим хүч, нефтийн бүтээгдэхүүн, хүнс, цемент, ган, бордооны хэрэгцээг дотоодоос хангаж, цаашид экспортлогч орон болох зорилгод иргэн бүрийн оролцоо чухал гэдгийг тэмдэглэсэн байна.
Уулзалтын төгсгөлд Ерөнхийлөгч бүх шатанд сахилга бат, хариуцлага, ёс зүйг эрхэмлэж, эв нэгдлээ хадгалан, ололт амжилтаа бататгаж, улс орныхоо хөгжлийн төлөө хичээн ажиллахыг уриалжээ.
