Шатахууны нийлүүлэлтийн асуудлаар ажиллаж буй Шуурхай штаб өнөөдөр ээлжит мэдээллээ хийж, АИ-92 автобензиний импорт үргэлжилж байгааг танилцуулжээ. Есдүгээр сарын 30-ны байдлаар төмөр замаар 217 вагонцистерн буюу 13 мянган тонн АИ-92 бензин Монгол Улс руу тээвэрлэгдэж байгаа аж.
Ашигт малтмал, газрын тосны газрын Газрын тосны хэлтсийн дарга Д.Даваабаярын мэдээлснээр дээрх 13 мянган тонн автобензин нь улсын ердийн хэрэглээгээр тооцоход ойролцоогоор 5-6 хоногийн хэрэгцээтэй тэнцэх хэмжээ юм.
68 вагон буух өртөөндөө хүрчээ
Тээвэрлэгдэж буй вагонцистернүүдээс 68 нь зориулалтын буух өртөөндөө хүрч, гаалийн бүрдүүлэлт хийж байгаа талаар мэдээлсэн байна. Үлдсэн ачилт төмөр замаар үргэлжлэн орж ирж байгаа аж.
Мөн Сүхбаатар болон Замын-Үүд боомтоор АИ-92 автобензиний импорт тасралтгүй хийгдэж байгаа гэж Шуурхай штабаас мэдээлжээ. Нийлүүлэгч талуудаас шатахууны ачилтыг үргэлжлүүлж байгаа гэдгийг Д.Даваабаяр онцолсон байна.
Есдүгээр сарын эцсийн байдлаар 257 мянган тонн газрын тосны бүтээгдэхүүн импортолжээ
Албан мэдээллээр 2026 оны есдүгээр сарын 30-ны байдлаар Монгол Улсад 59 мянган тонн АИ-92 автобензин, 188 мянга 570 тонн дизель түлш, 11 мянган тонн онгоцны түлш импортолсон байна.
Ингэснээр тайлант хугацаанд нийтдээ ойролцоогоор 257 мянган тонн газрын тосны бүтээгдэхүүн импортоор орж иржээ. Шуурхай штаб шатахууны нийлүүлэлт, хилээр орж ирж буй ачилтын явцыг үргэлжлүүлэн хянаж байгаа аж.
