Монгол Улс Дэлхийн адууны өдрийг 2026 оны долоодугаар сарын 11-13-нд анх удаа зохион байгуулж, санаачлагч улс орнуудын төлөөллийг нэг дор цуглуулахаар бэлтгэж байна. Адууны соёл, нүүдлийн иргэншлийн өв уламжлалыг олон улсад таниулах зорилготой энэ арга хэмжээ Монголын зуны томоохон соёлын үйл явдлын нэг болох төлөвтэй байна.
Дэлхийн адууны өдрийн хүрээнд 56 орны зочид, төлөөлөгчид Монгол Улсад хүрэлцэн ирнэ. Тэд адууны өв соёлыг сурталчлах ёслол хүндэтгэл, эрдэм шинжилгээний хурал, соёл урлаг, спортын цуврал арга хэмжээнд оролцохоос гадна 10 мянган морьтны жагсаалд нэгдэхээр төлөвлөжээ.
Арга хэмжээний гол хөтөлбөрүүд:
- Адууны өв соёлыг олон улсад сурталчлах ёслол хүндэтгэлийн ажиллагаа;
- Эрдэм шинжилгээ, соёл, урлаг, спортын цуврал үйл ажиллагаа;
- 56 орны зочид, төлөөлөгчдийн оролцоо;
- 10 мянган морьтны жагсаал.
Энэхүү өргөн цар хүрээтэй үйл явдалд олон улсад танигдсан “Physical Asia” шоуны оролцогчид оролцохоор болжээ. Тухайлбал, Япон, Солонгос, Филиппин, Австралийн шилдэг оролцогчид “Дэлхийн адууны өдөр”-ийн 10 мянган морьтны жагсаалд нэгдэхээ илэрхийлж, эхнээсээ урилгаа хүлээн авсан байна.
“Physical Asia” шоу цацагдсанаас хойш дээрх дөрвөн орны 10 гаруй зочин Монгол Улсад иржээ. Тэд Монголын ёс заншил, өв соёлтой танилцаж, тусгай нэвтрүүлэг бэлтгэн буцсан нь энэ удаагийн арга хэмжээний олон улсын анхаарлыг нэмэгдүүлэх нэг хүчин зүйл болж байна.
