Үндэсний болон олон улсын кино уран бүтээлчдийн шилдэг бүтээлүүдийг толилуулдаг 18 дахь удаагийн “Улаанбаатар” олон улсын кино наадмын уралдаант хэсэг болох “Хангарди” шагнал гардуулах ёслол 2026 оны аравдугаар сарын 22-ны өдөр боллоо. Энэ удаагийн наадмын Монгол киноны уралдаанд нийт 16 бүтээл өрсөлдсөнөөс найруулагч Ч.Хоролдоржийн “Цагаан хадны өнгө” бүтээл наадмын гол шагнал болох “Шилдэг кино”-гоор тодорсон байна.
“Хангарди” шагналын эзэд
Энэ жилийн наадмын хүрээнд бүтээлүүдийг зургаан төрлөөр үнэлж, дараах уран бүтээлчид “Хангарди” цомын эзэд боллоо:
- Шилдэг кино: “Цагаан хадны өнгө”
- Шилдэг найруулагч: Жанчивдоржийн Сэнгэдорж (“Ханын зураач” кино)
- Шилдэг зохиол: Баянжаргалын Гарамханд (“Нийгмийн дайсан” кино)
- Шилдэг зураглаач: Чойжоованчигийн Хоролдорж (“Цагаан хадны өнгө” кино)
- Шилдэг зураач: Баяраагийн Тэгшсүрэн (“Ханын зураач” кино)
- Шилдэг хөгжмийн зохиолч: Гаэл Ракотондрабе (“Цагаан хадны өнгө” кино)
Уралдаант хөтөлбөр ба наадмын ач холбогдол
Энэ жилийн “Монгол кино хөтөлбөр”-т ирүүлсэн 16 бүтээлээс “Цагаан хадны өнгө”, “Ханын зураач”, “Нийгмийн дайсан”, “Задлаагүй захиа”, “Явуулын хүн Говьд”, “Зуд” зэрэг кинонууд шалгаран үзэгчдийн хүртээл болсон бөгөөд тэдгээр нь “Шилдэг кино” номинацад өрсөлдсөн байна.
“Улаанбаатар” олон улсын кино наадам нь дэлхийн кино урлагийн чиг хандлага, шинэ бүтээлүүдийг дотоодын үзэгчдэд хүргэхээс гадна үндэсний кино үйлдвэрлэлийн чанар, өрсөлдөх чадварыг нэмэгдүүлэх, уран бүтээлчдийн хөдөлмөрийг үнэлэхэд чухал ач холбогдолтой юм. Мөн нийслэл Улаанбаатар хотыг урлаг, соёлын бүтээлч орон зай болгон олон улсад таниулах зорилгыг давхар агуулдаг байна.
