Найруулагч Ч.Хоролдоржийн “Цагаан хадны өнгө” баримтат киноны Монгол дахь нээлт 2026 оны аравдугаар сарын 19-нд “Тэнгис” кинотеатрт боллоо.
Тус бүтээлд Өмнөговийн нүүрс тээврийн замд ажилладаг цөөн эмэгтэй жолоочийн нэг С.Майхүүгийн амьдралыг зургаан жилийн турш даган баримтжуулжээ. Кино нь түүний хүүхдүүдийнхээ ирээдүйн төлөө эрсдэл өндөртэй, нийгэм болон эрүүл мэндийн хамгаалалт хангалтгүй орчинд ажиллаж буй бодит амьдралыг өгүүлдэг байна.
Монгол, Францын хамтарсан бүтээл
“Цагаан хадны өнгө” нь Францын “Petite Maison Production” болон Монголын “iCity Films”-ийн хамтын бүтээл юм.
Киноны зураг авалтыг Тавантолгой, Нарийн сухайтын нүүрсний орд, Ханбогд сумын нутаг дахь “Цагаан хад” суурин болон нүүрс тээврийн замуудын бодит орчинд хийжээ.
Бүтээлээр уул уурхайн хурдацтай өсөлт, их хэмжээний мөнгөн урсгалын цаана үлддэг тээвэрчдийн ажлын хүнд нөхцөл, өдөр тутмын амьдралыг хөндсөн байна.
Олон улсын кино наадмуудад сонгогджээ
“Цагаан хадны өнгө” 2026 оны зургаадугаар сараас олон улсын үзэгчдэд хүрч эхэлсэн бөгөөд Нью-Йоркийн “Трайбека”, Их Британийн “Шеффилд ДокФест” наадмын уралдаант хэсэгт сонгогджээ.
Мөн Цюрихийн кино наадмаас Filmpreis der Zürcher Kirchen шагнал хүртэж, Бусаны олон улсын кино наадмын “Wide Angle” хөтөлбөрт багтсан байна.
Найруулагч Ч.Хоролдоржийн өмнөх бүтээлүүд
Ч.Хоролдорж “Зүүд” богино хэмжээний киногоороо 2010 онд Каннын кино наадмын “Short Film Corner”-д, “Шарга даага” уран сайхны киногоороо 2013 онд Бусан, Фрибургийн наадамд оролцож байжээ.
Мөн “Говийн бүсгүй” бүтээлээрээ 2023 онд Британийн Grierson Award-аас “Шилдэг богино хэмжээний баримтат кино” шагнал хүртсэн байна.
“Цагаан хадны өнгө” баримтат киног удахгүй IPTV платформуудаар үзэгчдэд хүргэхээр төлөвлөжээ.
