Ямааны годрон өвчний эсрэг вакциныг Монгол Улсад дотооддоо үйлдвэрлэж, арваннэгдүгээр сарын дунд үеэс хэрэглээнд нэвтрүүлэхээр болжээ.
Засгийн газрын ээлжит хуралдааны шийдвэрийг танилцуулах үеэр Хүнс, хөдөө аж ахуй, хөнгөн үйлдвэрийн сайд Ц.Идэрбат энэ талаар мэдээлсэн байна.
Түүний хэлснээр ямааны годрон өвчний вакцины үйлдвэрлэлийг сэргээж, шинээр үйлдвэрлэх ажилд 1.5 тэрбум төгрөг хуваарилжээ. Мөн өвчний улмаас малынхаа сүргийг устгалд оруулсан өрхүүдэд нийт 5.3 тэрбум төгрөгийн нөхөн олговор олгохоор Засгийн газрын нөөц сангаас санхүүжүүлэхээр шийдвэрлэсэн байна.
24 мянга гаруй ямааг устгалд оруулжээ
Сайд Ц.Идэрбат нөхцөл байдлын талаар:
“24,000 гаруй ямааг устгалд оруулж, 5.3 тэрбум төгрөгийн нөхөн олговрыг Засгийн газрын нөөц сангаас гаргахаар шийдвэрлэлээ.
Одоогоос 14 хоногийн өмнө ямааны годрон өвчтэй холбоотой вакциныг өөрсдөө хийх, энэ вакциныг шинээр дахин үйлдвэрлэж эхлэх процесст зориулж 1.5 тэрбум төгрөг хуваарилах шийдвэр гарсан.
Вакциныг дотооддоо үйлдвэрлэхээр шинжлэх ухааны олон шат дамжлага дуусаад өөрсдийнхөө итгэмжлэгдсэн лабораториор баталгаажуулан, олон улсын итгэмжлэгдсэн лабораторид явуулаад байгаа.
Арваннэгдүгээр сарын дунд гэхэд ямааны годрон өвчний вакцин Монгол Улсад үйлдвэрлэлд нэвтэрнэ.
Ямааны годрон өвчин юунаас болж гарав, буруутай этгээдийг олж тогтоохыг Засгийн газраас Тагнуулын Ерөнхий Газар, Цагдаагийн Ерөнхий Газарт үүрэг болгосон. Үүний дагуу хянан шалгах үйл ажиллагаа явагдаж байгаа. Дараагийн асуудал бол буруутай этгээдээр нөхөн төлүүлнэ.
Годрон өвчнөөс болж ямаагаа устгалд оруулсан 58 өрхийн хохирлыг төр барагдуулж байна гэж ойлгож болно”
гэлээ.
Вакциныг олон улсын лабораторид баталгаажуулж байна
Дотооддоо үйлдвэрлэхээр бэлтгэж буй вакцин шинжлэх ухааны шаардлагатай шат дамжлагуудыг давсан бөгөөд Монголын итгэмжлэгдсэн лабораторийн баталгаажуулалтаас гадна олон улсын итгэмжлэгдсэн лабораторид шинжилгээнд хүргүүлээд байгаа аж.
Хэрэв төлөвлөгөөний дагуу ажил үргэлжилбэл арваннэгдүгээр сарын дунд үеэс ямааны годрон өвчний вакцин Монгол Улсын үйлдвэрлэлд албан ёсоор нэвтрэх юм.
Үүний зэрэгцээ өвчин ямар шалтгаанаар гарсан, хэн хариуцлага хүлээх ёстойг тогтоох чиглэлээр Тагнуулын ерөнхий газар болон Цагдаагийн ерөнхий газарт шалгалт хийх үүрэг өгсөн байна.
Шалгалтын дүнд буруутай этгээд тогтоогдвол учирсан хохирлыг нөхөн төлүүлэх асуудлыг цаашид шийдвэрлэхээр төлөвлөжээ.
Одоогоор годрон өвчний улмаас ямаагаа устгалд оруулсан 58 өрхийн хохирлыг төрөөс барагдуулж байгаа бөгөөд нөхөн олговрын нийт хэмжээ 5.3 тэрбум төгрөг байна.
