Их эзэн Чингис хааны мэндэлсэн өдөр буюу Монгол бахархлын өдөр 2026 оны арваннэгдүгээр сарын 10-ны мягмар гарагт тохиож байна. Энэ өдөр Монгол Улс даяар бүх нийтээр амрах юм.
“Нийтээр тэмдэглэх баярын болон тэмдэглэлт өдрүүдийн тухай” хуульд Их эзэн Чингис хааны мэндэлсэн билгийн тооллын өвлийн тэргүүн сарын шинийн нэгнийг нийтээр тэмдэглэх баярын өдөр болгон хуульчилсан байдаг. Уг өдрийг Монгол бахархлын өдөр хэмээн нэрлэж, бүх нийтийн амралтын өдөр болгон тэмдэглэдэг.
Монгол бахархлын өдрийг 2012 оноос тэмдэглэж эхэлжээ
Шинжлэх ухааны академийн тогтоосноор Их эзэн Чингис хаан билгийн тооллын гуравдугаар жарны усан морин жил буюу 1162 оны өвлийн тэргүүн сарын шинийн нэгэнд мэндэлжээ. Энэхүү судалгаанд үндэслэн Монгол Улс 2012 оноос түүний мэндэлсэн өдрийг Монгол бахархлын өдөр болгон тэмдэглэж ирсэн түүхтэй.
Энэ өдөр нь Их Монгол Улсыг үндэслэн байгуулсан Чингис хааны түүхэн гавьяаг дурсан хүндэтгэхийн зэрэгцээ монголчуудын өв уламжлал, үндэсний үнэт зүйл, тусгаар тогтнолын ач холбогдлыг дээдлэх утга агуулгатай юм.
Он дуусахаас өмнө бүх нийтийн амралтын хоёр өдөр тохионо
Монгол бахархлын өдрөөс гадна 2026 оны арваннэгдүгээр сарын 26-нд Бүгд Найрамдах Улс тунхагласан өдөр тохионо. Мөн арванхоёрдугаар сарын 29-нд Үндэсний эрх чөлөө, тусгаар тогтнолоо сэргээсний баярын өдрийг тэмдэглэх бөгөөд эдгээр өдөр мөн бүх нийтээр амрах хуулийн зохицуулалттай.
