Өвлийн дизель түлшний хэрэглээнд шилжиж эхэлсэнтэй холбоотойгоор дизель түлшний үнэ 800-900 төгрөгөөр нэмэгдэх төлөвтэй байна. Энэ талаар Аж үйлдвэр, эрдэс баялгийн яамны Төрийн нарийн бичгийн дарга Б.Дашпүрэв мэдээлжээ.
Түүний хэлснээр, аж ахуйн нэгжүүдийн үнийн нэмэгдэл харилцан адилгүй байх бөгөөд дизель түлшний үнийг зах зээлийн зарчмаар тогтоодог байна.
Хангайн бүс өвлийн дизель хэрэглэж эхэлжээ
Б.Дашпүрэвийн мэдээлснээр, Хангайн бүс нутагт өвлийн дизель түлш хэрэглэж эхэлсэн бол говийн бүсэд 14 хоногийн дараагаас шилжихээр байна.
Тэрбээр “Зуны дизель түлш хэрэглэж байгаатай холбогдуулан үнээ нэмэхгүй байх зөвлөмжийг өгч ажиллаж байсан. Өнөөдрийн байдлаар Хангайн бүс нутгаар өвлийн дизель түлш хэрэглэж байна” гэжээ.
Мөн өвлийн дизель түлш импортолж эхэлсэнтэй холбоотойгоор аж ахуйн нэгжүүд үнийн өөрчлөлтийн талаар мэдээллээ ирүүлж байгаа гэж тайлбарласан байна.
АИ-92-ын үнийг бодлогоор барьж байна
Яамны мэдээлснээр энгийн АИ-92 автобензиний үнийг бодлогоор тогтвортой барьж байгаа бол дизель түлш болон Евро-5 стандартын автобензиний үнэ чөлөөтэй байна.
Иймээс өвлийн дизель түлшний үнэ литр тутамд 800-900 төгрөгөөр өсөх боломжтой бөгөөд компани бүрийн нэмэгдэл ижил байхгүй гэж Б.Дашпүрэв мэдэгджээ.
