Нийслэлийн авто замын сүлжээг өргөтгөх, гэр хорооллын дахин төлөвлөлтийг дэмжих зорилгоор Сүхбаатар дүүргийн 13 дугаар хорооны нутаг дэвсгэрт бүтээн байгуулалтын ажил эрчимтэй өрнөж байна. Тодруулбал, Хайлаастаас Дарь-Эхийг холбосон авто замаас Сэлбэ дэд төв хүртэлх 960 метр урттай шинэ холболтын замыг тавьж байгаа бөгөөд ирэх долоодугаар сарын 1-ний өдөр бүрэн ашиглалтад оруулахаар төлөвлөн ажиллаж байна.
Уг төслийн гүйцэтгэгчээр “Грэйт роуд” ХХК ажиллаж байгаа бөгөөд замын чанар, стандартыг нарийн баримталж байгааг албаныхан онцоллоо. Тус компанийн инженер Г.Эрдэнэсүрэнгийн мэдээлснээр шинэ авто зам нь дараах техникийн шийдэл болон тохижилтын ажлуудыг багтааж байгаа юм:
- Авто зам нь долоон метр өргөн бөгөөд хоёр эгнээ зорчих хэсэгтэй байна.
- Замийн хоёр талаар явган хүний болон унадаг дугуйн зам, гэрэлтүүлэг, Ногоон байгууламжийг иж бүрэн шийднэ.
- Өнөөдрийн байдлаар суурь асфальт бетон хучилтыг бүрэн дуусгаж, өнгөн асфальт бетон хучилтын ажил үргэлжилж байна.
- Замын далангийн хажуугийн налуу хэсгийг төмөр бетон хавтангаар бэхжүүлэх ажил хийгдэж байна.
Шинэ замын ач холбогдлын талаар инженер Г.Эрдэнэсүрэн “Тус авто зам ашиглалтад орсноор Чингэлтэйн өргөн чөлөөний замын ачааллыг бууруулж, хөдөлгөөний урсгалыг хуваарилахад чухал ач холбогдолтой” гэв. Энэхүү холболтын зам бэлэн болсноор тухайн орчмын иргэдийн зорчих хөдөлгөөн хөнгөрөхөөс гадна хотын хойд бүсийн замын түгжрэлийг сааруулахад бодит дэмжлэг болно гэж албаныхан үзэж байна.
