Нийслэлийн Ерөнхий боловсролын 2 дугаар сургууль Монгол Улсын анхны “Google Reference School” буюу “Google”-ийн жишиг сургууль боллоо. Тус сургууль нь 130 гаруй багш, 3,600 орчим сурагчтай бөгөөд 2026 оны хоёрдугаар сараас эхлэн дижитал шилжилтийг туршин хэрэгжүүлж, “Google Workspace for Education” болон хиймэл оюун ухааны дэвшилтэт технологиудыг сургалтын үйл ажиллагаандаа иж бүрэн нэвтрүүлээд байна.
Сургалтын дэвшил ба хиймэл оюуны хэрэглээ
Цахим хэрэгсэл нэвтэрснээр багш нарын бичиг цаасны болон давтагддаг ажлын ачаалал буурч, мэдээлэл солилцох хурд мэдэгдэхүйц нэмэгджээ. Багш нарын 70 орчим хувь нь хичээлийн төлөвлөгөө болон сорил материал бэлтгэхдээ “Gemini AI”-ийг тогтмол ашиглаж байгаа бөгөөд байгалийн ухааны багш нар сургалтын контент зохиоход 100 хувь нэвтрүүлж, олон улсын батламж авсан байна. Мөн тус сургуулийн 2026 оны төгсөгч Э.Шижир “Google Gemini”-ийг бэлтгэлдээ ашигласны үр дүнд ЭЕШ-д англи хэлний хичээлээр 800 оноо авсан амжилт үзүүлжээ.
Засгийн газрын дэмжлэг ба цаашдын зорилт
Ерөнхий сайд Н.Учрал болон Боловсролын яамны төлөөллүүд тус сургуульд зочилж, 570 ширхэг “Chromebook” төхөөрөмж хүлээлгэн өгснөөр сурагчдын төхөөрөмжийн дутагдлыг бүрэн шийдвэрлэсэн юм. Энэ үеэр Ерөнхий сайд 2026-2027 оны хичээлийн жилд улсын хэмжээнд 100 сургуулийг “Google” жишиг сургууль болгон хөгжүүлж, 100 мянган “Chromebook” олгохоор төлөвлөж байгааг хэллээ. Сургуулийн зүгээс энэ хичээлийн жилээс эхлэн эцэг эх, багш, сургуулийн удирдлага, сурагчдыг холбосон дөрвөн талт хамтын ажиллагааны загварыг шинээр нэвтрүүлж байна.
