Монгол Улсын Засгийн газар боловсролын салбарыг улс орны хөгжлийн тэргүүлэх чиглэлээр тодорхойлж, 2026 оныг “Боловсролыг дэмжих жил” болгон зарлалаа. Дэлхийн болон Монголын багш нарын өдөрт зориулсан “Багш нарын төлөө хамтдаа” ахмад багш нарын зөвлөгөөний үеэр Ерөнхий сайд Н.Учрал энэ талаар онцолж, салбарын шинэчлэл болон бодлогын томоохон зорилтуудыг танилцуулсан юм.
Засгийн газраас “Эрдэм боловсролтой монгол хүн” зорилтын хүрээнд багш нарын нийгмийн баталгаа, цалин хөлсийг үе шаттайгаар нэмэгдүүлж, сургалтын орчинг сайжруулахад гол анхаарлаа хөгжүүлж байна.
Цалин хөлс, тэтгэврийн шинэчлэл
Засгийн газар байгуулагдсаныхаа дараа салбарын цалингийн зөрүүг арилгаж, 2026 оны тавдугаар сарын 1-ний өдрөөс багш болон боловсролын салбарын ажилтнуудын цалинг 50 хувиар нэмэгдүүлсэн билээ. Ингэснээр 91 мянга гаруй ажилтан цалингийн нэгдсэн сүлжээнд хамрагдаж, нийгмийн даатгал болон тэтгэврийн тооцоолол нь нэмэгдсэн дүнгээр хийгдэх боломж бүрджээ.
УИХ-аар хэлэлцэж буй 2026 оны улсын төсвийн тодотголд эдгээр ажилтнуудын цалингийн нэмэгдэлд зориулж 674 тэрбум төгрөгийг бүрэн баталгаажуулахаар тусгаад байна. Мөн ирэх арваннэгдүгээр сарын 1-нээс 434 мянган ахмад настанд 100-300 мянган төгрөгийн суурь тэтгэвэр олгохоор төлөвлөжээ. Түүнчлэн ирэх онд төрийн үйлчилгээний бүх албан хаагчийн цалинг дахин 10 хувиар нэмэхээр тооцсон байна.
Салбарын санхүүжилт ба “Багшийн гурван тулгуурт бодлого”
Боловсролын салбарын нийт төсөв ирэх онд 55 хувиар өсөж, 7.4 их наяд төгрөгт хүрэхээр байна. Энэ хүрээнд хувьсах зардлын санхүүжилтийг 500 тэрбум төгрөгөөр нэмэгдүүлсэн бөгөөд 2027 онд 1.3 их наяд төгрөгийн хөрөнгө оруулалт хийхээр төлөвлөжээ.
Засгийн газраас багшийн хөдөлмөрийн үнэлэмж, мэргэжлийн хөгжлийг дэмжих “Багшийн гурван тулгуурт бодлого”-ыг хэрэгжүүлж байна. Энэ оны эхний хагаст 64 мянга гаруй багш мэргэжил дээшлүүлсэн бол багшийн мэргэжлээр суралцаж буй 2150 оюутанд 15.5 тэрбум төгрөгийн тэтгэлэг олгожээ. Мөн 2027 оны төсөвт багш нарын тэтгэвэрт гарахад олгох нэг удаагийн тэтгэмж болон орон нутагт тогтвор суурьшилтай ажиллаж буй албан хаагчдын дэмжлэгийг нэмэгдүүлэхээр тусгасан байна.
Оюутолгойн ногдол ашгийн хөрөнгө оруулалт
Ерөнхий сайдын мэдээлснээр Оюутолгойн ногдол ашгийн үр өгөөжийг боловсролын салбарт түлхүү зориулахаар шийдвэрлэсэн байна. Тухайлбал, зургаан бүс тус бүрд олон улсад хүлээн зөвшөөрөгдсөн Кембрижийн хөтөлбөртэй сургууль, төрөлжсөн ахлах сургууль, 500 ортой дотуур байр барихаар төлөвлөжээ.
Түүнчлэн эрүүл, ухаалаг, ногоон орчин бүхий 100 сургууль байгуулж, сурагчдад Гүүглийн 100 мянган компьютер олгох ажил хийгдэх юм. Зөвлөгөөний төгсгөлд Ерөнхий сайд Н.Учрал “Монголчууд ном эрдмээрээ, мэдлэг боловсролоороо оюунаа зэвсэглэн дэлхийн тавцанд өрсөлдөнө. Энэ их үйл хэрэгт Монголын багш нар гол үүрэг гүйцэтгэнэ” хэмээн тэмдэглэлээ.
