Нийслэлийн хэмжээнд замын хөдөлгөөнд оролцож буй тээврийн хэрэгслийн яндан, дуу намсгуураас гарах дуу чимээнд хяналт шалгалт хийж эхэлжээ. Автотээврийн үндэсний төвөөс жолооч нарыг тээврийн хэрэгслийнхээ бүрэн бүтэн байдлыг шалгаж, хууль, стандартын шаардлагыг мөрдөхийг анхаарууллаа.
Хяналт шалгалтаар Монгол Улсын MNS 4599:2026 “Автотээврийн хэрэгслийн эргономикийн үзүүлэлтүүд” стандартад заасан зөвшөөрөгдөх дээд хэмжээнээс хэтэрсэн дуу чимээтэй тээврийн хэрэгслийг илрүүлж байна. Мөн Замын хөдөлгөөний дүрмийн 4 дүгээр хавсралтын 4.4-т заасан яндан, дуу намсгуур гэмтсэн, эсхүл байхгүй болсон автомашинд холбогдох арга хэмжээ авах аж.
Зөрчилтэй тээврийн хэрэгсэлд авах арга хэмжээ:
- Дуу чимээний хэмжилт, хяналт шалгалтад хамруулах
- Яндан, дуу намсгуурын бүрэн бүтэн байдлыг шалгах
- Стандартын шаардлага хангахгүй бол техникийн үзлэг, оношилгоог хүчингүй болгох
- Жолоочид хууль, дүрмийн шаардлагыг биелүүлэхийг шаардах
Тодруулбал, дуу чимээний шаардлага хангахгүй, зөрчилтэй тээврийн хэрэгслийн техникийн үзлэг, оношилгоог хүчингүй болгох арга хэмжээ авах юм байна. Иймээс жолооч нар замын хөдөлгөөнд оролцохоос өмнө автомашиныхаа яндан, дуу намсгуур хэвийн эсэхийг шалгах шаардлагатай.
Нийслэлд дуу чимээний бохирдлыг бууруулах, замын хөдөлгөөнд оролцогчдын тав тух, аюулгүй байдлыг хангах зорилгоор энэ төрлийн хяналт үргэлжлэхээр байна. Автотээврийн үндэсний төвөөс тээврийн хэрэгслийн техникийн бүрэн бүтэн байдлыг хангаж, стандартын шаардлага зөрчихгүй байхыг жолооч нарт санууллаа.
