Арваннэгдүгээр сарын 1-нээс эхлэн 413 мянган ахмадын дансанд суурь тэтгэврийн мөнгийг шилжүүлж эхэлсэн байна. Уг тэтгэврийг улсын төсвөөс санхүүжүүлж, ахмадуудын одоо авч буй тэтгэвэр дээр нэмэлтээр сар бүр олгох юм.
Суурь тэтгэврийн хэмжээ 100-300 мянган төгрөг байх бөгөөд шаардлага хангасан ахмадууд энэ нэмэгдлийг сар бүр авах зохицуулалттай.
Эмэгтэй 55, эрэгтэй 60 нас хүрсэн иргэд хамрагдана
Суурь тэтгэвэрт нийгмийн даатгалын сангаас өндөр насны тэтгэвэр авч буй болон цэргийн тэтгэвэр тогтоолгосон иргэд хамрагдах юм. Ингэхдээ эмэгтэйчүүд 55, эрэгтэйчүүд 60 нас хүрсэн байх шаардлагатай.
Тэтгэврийн нэмэлт олголтыг авахын тулд ахмадууд холбогдох байгууллагад тусгайлан хүсэлт гаргах, нэмэлт бичиг баримт бүрдүүлэх шаардлагагүй. Шаардлага хангасан иргэдийн дансанд суурь тэтгэврийг шууд шилжүүлэхээр зохицуулжээ.
Ийнхүү арваннэгдүгээр сараас эхлэн нийт 413 мянган ахмад одоогийн тэтгэвэр дээрээ улсын төсвөөс санхүүжүүлэх суурь тэтгэврийг нэмж авах юм.
