2025 оны эцсийн байдлаар дэлхий даяарх тэрбумтнуудын тоо 3,795-д хүрч, түүхэн дээд үзүүлэлт тогтоосон байна. Altrata аналитик компанийн тайланд дурдсанаар, тэдний нийт хөрөнгө мөн рекорд түвшинд буюу 15.1 их наяд ам.долларт хүрчээ.
Тайлангийн зохиогчдын мэдээлснээр, 2025 онд тэрбумтнуудын тоо 8.2%-иар өссөн нь сүүлийн таван жилийн хамгийн өндөр өсөлт болсон байна. Үүнд хөрөнгийн зах зээлийн өсөлт, мөнгөний бодлогын дэмжлэг, хиймэл оюуны салбар дахь хөрөнгө оруулалтын бум нөлөөлжээ.
Нэг жилийн дотор 287 хүн тэрбумтнуудын эгнээнд нэгдэв
2025 онд тэрбумтнуудын клубт шинээр 287 хүн нэмэгдсэн байна. Харин сүүлийн 10 жилийн хугацаанд дэлхийн тэрбумтнуудын тоо бараг 60%-иар өсжээ.
Тэдний нийт хөрөнгө 2024 онтой харьцуулахад 12.8%-иар нэмэгдэж, 15.1 их наяд ам.долларт хүрсэн байна. Altrata-ийн тайланд энэ дүнг S&P 500 индексийн нийт зах зээлийн үнэлгээний бараг дөрөвний нэгтэй тэнцэх хэмжээ гэж онцолжээ.
Одоогоор нэг тэрбумтны дундаж хөрөнгө 4 тэрбум ам.доллар байна. Гэхдээ медиан үзүүлэлт нь ойролцоогоор 2 тэрбум ам.долларт дөхөж байгаа нь хамгийн баян хүмүүсийн дотор ч хөрөнгийн хуваарилалт ихээхэн тэгш бус байгааг харуулж байна.
“Супер тэрбумтнууд” нийт хөрөнгийн 27%-ийг хянаж байна
Аналитикчид 50 тэрбум ам.доллараас дээш хөрөнгөтэй хүмүүсийг “супер тэрбумтнууд” гэж ангилжээ. Одоогоор ийм хэмжээний хөрөнгөтэй 29 хүн байна.
Энэхүү цөөн тооны бүлэг дэлхийн нийт тэрбумтнуудын хөрөнгийн 27%-ийг хянаж байгаа аж. Харьцуулбал, 2017 онд тэдний эзлэх хувь ердөө 7% байсан байна.
Ингэснээр 2025 он тэрбумтнуудын тоо болон нийт хөрөнгийн хэмжээгээр түүхэн дээд үзүүлэлт тогтоосон жил болжээ.
