Робот болон хиймэл оюун ухааны хөгжил сүүлийн жилүүдэд эрчимтэй урагшилж байгаа бөгөөд энэ өөрчлөлт спортын салбарт ч тод илэрч эхэллээ. Үүний нэг жишээ нь “Sony” компанийн бүтээсэн хиймэл оюун ухаант “Ace” робот бөгөөд тэрбээр ширээний теннисийн мэргэжлийн тамирчидтай эн тэнцүү өрсөлдөж, зарим тохиолдолд ялалт байгуулж байгааг шинэ судалгаа харуулжээ.
Тус робот ширээний теннисийг бататгах сургалт буюу reinforcement learning аргаар сурсан байна. “Ace”-ийн гол давуу тал нь хүний биед байдаггүй мэдрэх, тооцоолох чадварт оршиж байгаа бөгөөд ширээний эргэн тойронд байрлуулсан есөн камерын тусламжтайгаар бөмбөгний логог таньж, эргэлтийг нь хүртэл хэмждэг аж.
“Sony” компанийн хиймэл оюун ухааны судлаач Питер Дюрр “Ace”-ийн талаар хийсэн эрдэм шинжилгээний бүтээлээ “Nature” сэтгүүлд нийтлүүлжээ. Туршилтын хүрээнд компани Токио дахь төв байрандаа олимпын тэмцээнд ашигладаг стандарт хэмжээтэй талбай байгуулж, роботын гүйцэтгэлийг бодит орчинд шалгасан байна. Судалгаанд оролцсон мэргэжлийн тамирчид “Ace”-ийн тоглолтын түвшинг хараад гайхсан гэж мэдээлжээ.
“Sony”-ийн тайлбарласнаар, робот ямар нэгэн спортын төрөлд хүний хэмжээнд, тэр дундаа мэргэжлийн түвшинд тоглосон анхны тохиолдол энэ болж магадгүй аж. Тус компани үүнийг хиймэл оюун ухаан болон робот техникийн судалгаанд гарсан онцгой ахиц гэж үнэлсэн байна.
“Ace” роботын бүтцийн нэг онцлог нь үетэй тул хөдөлгөөнийг далайцтай, уян хатан гүйцэтгэж чаддагт оршиж байна. “Sony”-гийн хиймэл оюун ухаан хариуцсан ерөнхийлөгч Майкл Спрангер энэ талаар “Хурд бол робот хөгжүүлэлтийн гол асуудлуудын нэг. Ялангуяа тусгайлан бүрдүүлсэн хяналттай орчноос гадуур байхдаа хурдтай байх нь маш чухал” хэмээн онцолжээ.
Тэрбээр мөн үйлдвэрлэлийн салбар дахь өнөөгийн роботуудыг жишээ болгон тайлбарласан байна. Тодруулбал, “Үйлдвэрүүдэд хурдан хөдөлгөөнтэй роботууд олон тоогоор ажилладаг. Гэхдээ тэдгээр роботууд зөвхөн нэг хөдөлгөөнийг л давтан хийдэг. Харин манай технологи роботыг байнгын өөрчлөлттэй орчинд уян хатан, хурдан бөгөөд өрсөлдөх чадвартай болгож байна” гэж хэлсэн бөгөөд ийм технологийг үйлдвэр болон бусад салбарт ашиглах боломжтой гэж үзэж байгаа аж.
Хиймэл оюун ухааны хөгжлийг өмнө нь судлаачид шатар зэрэг хөлөгт тоглоомоор голчлон хэмждэг байсан. Дараа нь видео тоглоом ийм туршилтын үндсэн талбар болж өргөжсөн ч, бодит ертөнцөд ажиллах чадвартай систем бүтээх нь робот хөгжүүлэгчдийн хамгийн том зорилго хэвээр байсан юм.
Энэ чиг хандлага зөвхөн ширээний теннисээр хязгаарлагдахгүй байгааг өнгөрсөн ням гарагт /2026.04.19/ Бээжинд болсон хагас марафон дахин харуулжээ. Уг уралдаанд “Honor” компанийн бүтээсэн хүн дүрст робот түрүүлсэн бөгөөд өмнөх жилийн тэмцээнд зарим робот гараанаасаа ч гарч чадаагүй байсан бол энэ жил “Honor” компанийн робот Бээжингийн хагас марафоны рекордыг эвдсэн байна.
- “Ace” робот ширээний теннисийг reinforcement learning аргаар сурчээ
- Роботын системд бөмбөгний эргэлтийг хэмжих есөн камер ашигласан байна
- Судалгааны ажлыг Питер Дюрр “Nature” сэтгүүлд нийтлүүлжээ
- /2026.04.19/-нд Бээжингийн хагас марафонд “Honor” компанийн робот түрүүлсэн байна
