Монголын кино урлагийн салбарт шинэ амжилт тодорлоо. “Хувьсгал” продакшны бүтээсэн “Хувь заяа” уран сайхны кино АНУ-ын Сан Диего хотод болсон 24 дэх удаагийн “Сан Диего олон улсын кино наадам”-д “HELLO MOTHER” нэрээр оролцож, “Шилдэг бүрэн хэмжээний кино” төрөлд тэргүүлжээ.
Энэхүү нэр хүндтэй наадамд дэлхийн 29 орны уран бүтээлчид шилдгийн төлөө өрсөлдсөн бөгөөд Монголын уран бүтээлчид анх удаа энэхүү шагналыг хүртсэн нь тус салбарын хувьд том ололт хэмээгдэж байна.
Киноны уран бүтээлийг “Хувьсгал” продакшн, Team.Hero, Three Flames Pictures студи хамтран бүтээсэн бөгөөд зохиол, найруулгыг Г.Бямбасүрэн, ерөнхий продюсерын үүргийг Ц.Анударь гүйцэтгэсэн байна.
“Хувь заяа” кино хүний дотоод ертөнц, хувь тавилангийн сонголтын тухай өгүүлэх бөгөөд дэлхийн үзэгчдээс өндөр үнэлгээ авсан нь Монгол кино урлагийн чансаа өсөн дээшилж буйг харууллаа.
