Улаанбаатар хотын агаарын чанарыг сайжруулах, утааг бууруулах стратегийн хүрээнд 2026 онд томоохон шинэчлэл хийхээр төлөвлөжээ. “Агаарын чанарыг сайжруулах ногоон бүс”-д багтаж буй нийслэлийн таван дүүргийн 35 хорооны айл өрхүүдийг шингэрүүлсэн нефтийн хийн (ШНХ) халаалтад үе шаттайгаар шилжүүлэх бэлтгэл ажил эхэлсэн байна. Энэхүү арга хэмжээ нь гэр хорооллын янданг цөөлж, иргэдийн амьдрах орчныг эрүүлжүүлэхэд чиглэсэн цогц ажлын нэг хэсэг юм.
Төслийн хүрээнд нийт 51,080 өрхийг хийн халаалтын системд холбохоор төлөвлөсөн бөгөөд дүүрэг бүрээр нарийвчилсан тооцоог гаргажээ. Дараах хороодын оршин суугчид энэхүү шилжилтэд хамрагдах юм:
- Сонгинохайрхан дүүрэг: 6, 8, 9, 11, 23, 28, 30, 31, 39, 43 дугаар хорооны 14,685 өрх;
- Баянзүрх дүүрэг: 2, 21, 27, 29, 30, 31 дүгээр хорооны 13,655 өрх;
- Чингэлтэй дүүрэг: 7, 8, 9, 10, 11, 12, 13, 14, 20, 21 дүгээр хорооны 12,229 өрх;
- Баянгол дүүрэг: 9, 10, 11, 16, 21, 22, 23, 7 дугаар хорооны 8,483 өрх;
- Сүхбаатар дүүрэг: 12, 13, 2 дугаар хорооны 2,028 өрх.
Хийн халаалтад шилжих хүсэлтэй айл өрхүүдэд зориулсан дэмжлэг, урамшууллыг төрөөс таатай нөхцөлөөр шийдвэрлэсэн байна. Хэрэв тухайн айл өрх сууцныхаа дулаалгыг стандартын дагуу бүрэн шийдсэн бол шингэрүүлсэн хийн халаалтын зуухыг нэг удаа үнэ төлбөргүй суурилуулж өгөхөөр тогтжээ. Мөн халаалтын улирал буюу есдүгээр сарын 15-ны өдрөөс дараа оны тавдугаар сарын 15-ныг хүртэлх хугацаанд нийт 900,000 төгрөгийн үнийн урамшуулал олгох юм байна. Уг хөнгөлөлтийг бэлэн мөнгөөр олгохгүй бөгөөд иргэдийн тухайн сард хэрэглэсэн хийн төлбөрөөс үе шаттайгаар хасаж тооцох механизмаар хэрэгжүүлэх аж.
Иймд төлөвлөлтөд багтсан хороодын оршин суугчид өөрийн харьяа хорооны захиргаанд хандаж, асуумжийн хуудас бөглөн бүртгүүлэх шаардлагатайг албаныхан анхааруулж байна. Иргэдийн идэвхтэй оролцоо нь нийслэлийн агаарын бохирдлыг бууруулах, хотын иргэн бүр эрүүл, аюулгүй орчинд амьдрах нөхцөлийг бүрдүүлэхэд хамгийн чухал хувь нэмэр болох юм.
