Дэлхийд зочлох үйлчилгээгээрээ тэргүүлэгч Hilton Worldwide Holdings группийн дээд ангиллын “Конрад Улаанбаатар” зочид буудлын барилгын ажил нийслэлийн төв хэсэгт үргэлжилж байна. Нийт 55 давхар бүхий энэхүү тансаг зэрэглэлийн цогцолборыг 2028 онд ашиглалтад оруулж, үйл ажиллагааг нь эхлүүлэхээр төлөвлөн ажиллаж байгаа юм.
Хотын өнгө төрхийг тодорхойлох шинэ бүтээн байгуулалт
Conrad Hotels & Resorts брэнд нь олон улсын санхүү, аялал жуулчлалын гол цэгүүдэд үйл ажиллагаагаа явуулдаг Hilton группийн хамгийн дээд зэрэглэлийн сүлжээнд тооцогддог. Уг төсөл ашиглалтад орсноор манай улсад Hilton брэндийн анхны өндөр зэрэглэлийн зочид буудал нээгдэхээс гадна Улаанбаатар хотын өнгө төрхийг тодорхойлох шинэ өндөр барилгуудын нэг болох юм.
Төслийн онцлог ба үйлчилгээний шийдлүүд
Нийт 227 өрөөтэй тус цогцолбор нь олон улсын стандартын зочид буудлын үйлчилгээг үзүүлэхээс гадна өөр бусад тансаг шийдлүүдийг багтаахаар төлөвлөгджээ. Тухайлбал, 55 давхар уг барилгад дараах чиглэлийн үйлчилгээний цогцолборууд байрлах юм.
- Тансаг зэрэглэлийн ресторан, зоогийн газрууд;
- Олон улсын хурал, уулзалтын зориулалттай танхимууд;
- Амралт, үйлчилгээний иж бүрэн цогц хэсгүүд.
Ташрамд дурдахад, Hilton Worldwide Holdings нь дэлхийн 100 гаруй улс, нутаг дэвсгэрт олон мянган зочид буудалтай дэлхийн хамгийн том зочлох үйлчилгээний компаниудын нэг билээ. Тус группийн хувьд Conrad брэнд нь хамгийн өндөр зэрэглэлийн ангилалдаа багтдаг бөгөөд манай нийслэлийн хөгжилд чухал хувь нэмэр оруулна гэж үзэж байна.
