Монгол Улсад мансууруулах эм, сэтгэцэд нөлөөт бодистой холбоотой хууль бус үйлдлүүд буурахгүй байгааг прокурорын байгууллагын сүүлийн үеийн тоон мэдээлэл харуулж байна. Тодруулбал, 2026 оны 5 дугаар сарын байдлаар Эрүүгийн хуулийн 20.7 дугаар зүйлд заасан гэмт хэрэгт холбогдсон 149 иргэнд хамаарах 104 хэрэгт яллах дүгнэлт үйлдэж, шүүхийн шатанд шилжүүлжээ. Үүнээс гадна Нийслэлийн прокурорын газраас 2026 оны 5 дугаар сарын 25-наас 29-ний өдрүүдэд 4 хүнд холбогдох 2 хэргийг анхан шатны шүүхээр эцэслэн шийдвэрлүүлсэн байна. Тус шүүх хурлаар ял шийтгүүлсэн иргэд нь бүгд 26-28 насны эмэгтэйчүүд байсан бөгөөд тэдний 3-т нь 2 жил, 6 сараас 8 жил, 6 сарын хугацаатай хорих ял оноож, үлдсэн нэг хүний зорчих эрхийг хязгаарлахаар шийдвэрлэжээ.
Бүлэглэж хилээр бодис нэвтрүүлсэн болон зочид буудалд хадгалсан хэрэг
Шүүхээр шийдвэрлэгдсэн эхний хэрэгт БНТУ-д оршин сууж буй иргэнтэй хамтран, НҮБ-ын 1971 оны “Сэтгэцэд нөлөөлөх бодисын тухай конвенц”-ийн II жагсаалтад багтсан метамфетамины агууламжтай, “мөс” гэх нэршилтэй, нийт 239,4 грамм жинтэй сэтгэцэд нөлөөт бодисыг бусдын ачаанд дайж хил давуулсан асуудал яригдсан юм. Уг хууль бус ажиллагааг Л.Д (26 настай, эмэгтэй), Х.Н (28 настай, эмэгтэй) нар зохион байгуулж, 2023 оны 7 дугаар сарын 03-ны өдөр “Чингис хаан” олон улсын агаарын замын боомоор Монгол Улсын хилээр нэвтрүүлж, олж авч, хадгалжээ. Түүнчлэн Л.Д нь уг хэрэгтээ шалгагдаж байх явцдаа дахин хууль зөрчиж, Б.Х (26 настай, эмэгтэй)-тэй бүлэглэн 2024 оны 11 дүгээр сарын 21-ний өдөр Баянгол дүүргийн 9 дүгээр хорооны нутаг дэвсгэрт байрлах Э нэртэй зочид буудлын өрөөнд өөртөө хэрэглэх зорилгоор “мөс” хадгалсан байна.
Шүүхээс дээрх иргэдийн гэм бурууг хэлэлцээд Эрүүгийн хуулийн 20.7 дугаар зүйлийн 1 дэх хэсэг, 3 дахь хэсгийн 3.3-т заасныг үндэслэн яллах дүгнэлтийг баталжээ. Ингэхдээ шүүгдэгчдэд дараах ял шийтгэлүүдийг оногдуулсан байна:
- Хориглосон сэтгэцэд нөлөөт бодисыг худалдаалах зорилгоор улсын хилээр нэвтрүүлсэн Х.Н-д 5 жил, 6 сарын хугацаагаар хорих ял оноов.
- Сэтгэцэд нөлөөт бодисыг худалдаалах зорилгогүйгээр олж авсан, хадгалсан Б.Х-ийн зорчих эрхийг 1 жилийн хугацаагаар хязгаарлахаар тогтов.
- Дээрх хоёр гэмт хэрэгт зэрэг буруутгагдсан Л.Д-д нийт 8 жил, 6 сарын хугацаагаар хорих ял оноож шийдвэрлэсэн байна.
Гэртээ хориглосон сэтгэцэд нөлөөт бодис хадгалсан зөрчил
Шүүхээр эцэслэгдсэн дараагийн хэрэг нь иргэн Ц.А (27 настай, эмэгтэй)-д холбогдох зөрчил юм. Тэрбээр 2025 ONЫ 5 дугаар сарын 24-ний өдөр метамфетамины агууламж бүхий, НҮБ-ын 1971 оны “Сэтгэцэд нөлөөлөх бодисын тухай” конвенцын II жагсаалтад багтсан “мөс” гэх бодисыг хууль бусаар олж авсан байна. Улмаар уг бодисоо mөн оны 5 дугаар сарын 27-ны өдөр Баянгол дүүргийн 24 дүгээр хорооны нутаг дэвсгэрт байрлах гэртээ хадгалж байгаад хууль хяналтынханд баригджээ. Анхан шатны шүүхээс түүнийг сэтгэцэд нөлөөлөх бодисыг худалдаалах зорилгогүйгээр хууль бусаар олж авсан, хадгалсан гэм буруутайд тооцон, 2 жил, 6 сарын хугацаагаар хорих ял оноосон байна.
