Монгол Улсын цаг уурын салбарын түүхэнд нэгэн шинэ хуудас нээгдэж, агаар мандлын дээд үе давхаргыг нарийвчлан судлах орчин үеийн аэрологийн төв үүд хаалгаа нээлээ. Өвөрхангай аймгийн Арвайхээр хотод сүндэрлэсэн тус төвийн нээлтийн ажиллагаа 2026 оны зургаадугаар сарын 14-ний өдөр албан ёсоор болсон байна. Энэхүү бүтээн байгуулалт нь Монгол Улсын Засгийн газрын хэрэгжүүлэгч агентлаг Цаг уур, орчны шинжилгээний газар болон БНСУ-ын Үндэсний цаг уурын газар, Цаг уурын хүрээлэн хоорондын олон жилийн түншлэлийн үр дүн юм.
Тус төвийг БНСУ-ын Засгийн газрын буцалтгүй тусламжаар хэрэгжүүлсэн “Монгол Улсад цаг уурын нэгдсэн автомат систем суурилуулах нь I, II” төслийн хүрээнд байгуулжээ. Энэхүү томоохон төсөл нь 2017-2019 болон 2022-2026 онуудад хоёр үе шаттайгаар амжилттай хэрэгжиж дууссан байна. Төслийн хоёрдугаар шатны хүрээнд техникийн болон бүтцийн дараах шинэчлэлтүүдийг хийжээ:
- Төвийн бүсийн аймаг, сумдад цаг агаарын автомат 52 станцыг шинээр суурилуулсан.
- Арвайхээр хотод “Агаар мандлын дээд үе давхаргыг судлах аэрологийн төв”-ийг иж бүрэн байгуулсан.
- Агаар мандлын дээд давхаргын мэдээллийг дэлхийн стандартын дагуу тогтмол цуглуулж, боловсруулах техникийн нөхцөлийг бүрдүүлсэн.
Шинэ төв ашиглалтад орсноор манай улсын цаг агаарын урьдчилсан мэдээний чанар, нарийвчлал олон улсын түвшинд хүрч сайжрах ач холбогдолтой юм. Энэ нь байгаль орчныг хамгаалах, уур амьсгалын өөрчлөлтийг урт хугацаанд судлах төдийгүй нисэхийн цаг уур, сэргээгдэх эрчим хүчний нөөцийн үнэлгээ зэрэг олон салбарт шинэ боломжийг олгож байна.
Нээлтийн үеэр Байгаль орчин, уур амьсгалын өөрчлөлтийн сайд Ц.Сандаг-Очир тус хөрөнгө оруулалтын стратегийн ач холбогдлыг өндөр үнэлэв. Тэрбээр “Монгол Улсын Засгийн газар иргэдийн аюулгүй орчинд ажиллаж, амьдрах нөхцөлийг бүрдүүлэх, гамшгийн эрсдэлийг бууруулах, уур амьсгалын өөрчлөлтийн сөрөг нөлөөллийг даван туулах үндэсний чадавхыг бэхжүүлэх зорилтыг төрийн бодлогын тэргүүлэх чиглэл болгон хэрэгжүүлж байгаа”-г онцолсон юм. Мөн уур амьсгалын өөрчлөлтийн судалгаа, нүүрстөрөгчийн эргэлт, усны менежмент болон бүс нутгийн гамшгийн эрсдэлийн хамтарсан мониторингийн чиглэлээр гадаад хамтын ажиллагаа өргожих суурь болж байгааг тэмдэглэлээ.
