Монгол Улсын Аж үйлдвэр, эрдэс баялгийн сайд Г.Дамдинням болон ОХУ-ын Эрчим хүчний сайд Сергей Евгеньевич Цивилёв нар албан ёсны уулзалт хийж, хоёр улсын Засгийн газар хоорондын чухал хэлэлцээрт гарын үсэг зурлаа. Энэхүү уулзалтын хүрээнд “Монгол Улсад Агаарын хөлгийн түлш нийлүүлэх тухай” хэлэлцээрийн нэмэлт протоколыг баталгаажуулснаар манай улсын агаарын тээврийн салбарт түлшний хангамжийн тогтвортой байдлыг хангах томоохон алхам хийгдэж байна.
Шинээр баталсан протоколын дагуу ОХУ-ын талаас Монгол Улсад агаарын хөлгийн түлшийг хөнгөлөлттэй нөхцөлөөр, тогтмол хуваарийн дагуу нийлүүлэх үүрэг хүлээж байгаа юм. Уг баримт бичиг нь өмнө нь байгуулсан “Монгол Улсад газрын тосны бүтээгдэхүүн нийлүүлэх тухай” хэлэлцээртэй нэгдмэл байдлаар, хамтдаа хүчин төгөлдөр үйлчлэхээр зохицуулагджээ.
Аж үйлдвэр, эрдэс баялгийн яамнаас мэдээлж буйгаар энэхүү гэрээ нь стратегийн дараах ач холбогдолтой:
- Ойрхи Дорнод дахь геополитикийн нөхцөл байдлаас үүдэлтэй газрын тосны үнийн огцом өсөлтийн сөрөг нөлөөг дотоодын зах зээлд бууруулах.
- Агаарын хөлгийн түлшний хангамжийг урт хугацаанд тасралтгүй, тогтвортой байлгах нөхцөлийг бүрдүүлэх.
- Шатахууны үнийн савлагаанаас үүдэлтэй эдийн засгийн дарамтыг багасгах.
Дэлхийн зах зээл дээрх газрын тос болон шатахууны үнийн хэлбэлзэл урьд өмнө байгаагүй түвшинд хүрээд буй энэ үед уг хэлэлцээрийг байгуулсан нь манай улсын эрчим хүчний аюулгүй байдалд онцгой хувь нэмэр оруулна гэж салбарын яам онцоллоо. Ингэснээр нислэг үйлдэх зардлыг хянах, иргэний нисэхийн салбарын өрсөлдөх чадварыг хамгаалахад бодитой дэмжлэг болох юм.
