Дуучин Н.Ундрал бие даасан анхны “Сайхан ч юм даа” уран бүтээлийн тоглолтоо аравдугаар сарын 17-ны бямба гарагт “АСА арена”-д үзэгчдийн хүртээл болголоо. Эл тоглолтын тасалбар товлосон өдрөөс гурван хоногийн өмнө бүрэн борлогдож дууссан төдийгүй эрэлт их байсны улмаас дамлагдан 240 мянган төгрөгийн үнэ хүрсэн байна.
Дээд хэмжээний тайз засалт ба хөтлөгчид
Уг тоглолтын ерөнхий зохион байгуулалтыг “333 энтертайнмент”-ийн хамт олон гүйцэтгэсэн бөгөөд битүү танхимд зассан хамгийн том тайзтай тоглолтуудын нэг болсноороо онцлог байв. Мэргэжлийн түвшний хөгжмийн дуугаралт болон зохион байгуулалтын өндөр нарийвчлал нь үзэгчдийн талархлыг хүлээсэн бөгөөд тоглолтыг “Мөрөөдлийн театр”-ын жүжигчин Г.Алтаншагай, “Фантастик” продакшны жүжигчин Ж.Алтаншагай нар хөтлөн явуулжээ.
Урлагийн акулуудын хамтрал ба шинэ бүтээл
Тоглолтын хөтөлбөрт сүүлийн жилүүдэд хамтдаа тайзнаа гараагүй Гавьяат жүжигчин Г.Эрдэнэбат, Ц.Түвшинтөгс, Х.Үнэнхүү нар хоршин дуулж үзэгчдийн сонорыг мялаав. Түүнчлэн Ардын жүжигчин, Зууны манлай эстрадын дуучин Б.Сарантуяа дуучин Н.Ундралтай хамтарсан “Мөнх тэнгэрийн Монгол” хэмээх цоо шинэ уран бүтээлээ анх удаа эгшиглүүлсэн юм. Мөн “Анир” поп оркестр бүрэн бүрэлдэхүүнээрээ оролцсон бол “Увертюра” хамтлаг, дуучин Э.Оюумаа, Г.Эрдэнэчимэг, П.Идэржавхлан нар хамтарсан бүтээлүүдээ хүргэлээ.
Гэр бүлийн нандин гэнэтийн бэлэг
Үдшийн хамгийн сэтгэл хөдөлгөм мөч нь дуучны гэр бүлийн үзүүлбэр байлаа. Н.Ундрал өөрийн гэргий Л.Энхжаргал, охин У.Гэгээ, ихэр хөвгүүд болох У.Дүүрэн, У.Дүүлэн нарын хамт тайзнаа гарч, Ардын уран зохиолч Ү.Хүрэлбаатарын шүлэг, С.Алтаннарын хөгжим “Миний гэр бүл, миний аз жаргал” дууг дуулан үзэгч олонд гэнэтийн бэлэг барьсан байна.
