Аж үйлдвэр, эрдэс байгалийн яамны Төрийн нарийн бичгийн дарга Б.Дашпүрэв Засгийн газрын Шуурхай штабын ээлжит мэдээллийн үеэр БНХАУ-аас импортолж буй шатахууны хэмжээг нэмэгдүүлэх, боомтуудын хүчин чадлыг сайжруулахаар ажиллаж байгааг мэдээллээ.
Шатахуун болон дизель түлшний нийлүүлэлтийн явц
Наймдугаар сарын хэмжээнд нийт 74,780 тонн АИ-92 авто бензин захиалснаас өнөөдрийн байдлаар 51,000 тонныг хүлээн аваад байна. Сарын сүүлч гэхэд үлдсэн 23,000 гаруй тонныг нэмж татан авах боломжтой бөгөөд дизель түлшний хувьд захиалсан 158,650 тонноос 130,000 тонн бүтээгдэхүүн орж ирэн, ачилт хэвийн үргэлжилж байгаа юм.
Сүүлийн 24 цагийн хугацаанд 3,360 тонн авто бензин хүлээн авснаас Улаанбаатар хотын 88 шатахуун түгээх станцад 780 тонн, орон нутгийн 45 станцад 500 тонныг тус тус хуваарилан түгээжээ. Мөн өртөөнд буугаад буй 2,500 гаруй тонн бүтээгдэхүүнийг түгээлтэд гаргаж эхлээд байна. Шатахууны нийлүүлэлтийг тогтвортой хадгалахын тулд БНХАУ-аас авах импортыг нэмэгдүүлэхээс гадна хилийн боомтуудын нэвтрэх хүчин чадлыг дээшлүүлж, бэлэн байдлыг нь хангахад анхаарч байна.
