Netflix-ийн алдарт “Тоглоомын хаш” (Squid Game) цувралын гуравдугаар улирал 6-р сарын 27-нд дэлхий даяар нээлтээ хийж, богино хугацаанд Netflix-ийн бүх улс оронд №1 цуврал болсон ч энэ амжилт нь түүнийг бүтээсэн Өмнөд Солонгосын компаниудын хувьцаанд эерэг нөлөө үзүүлсэнгүй.
Bloomberg агентлагийн мэдээлснээр, цувралтай холбоотой хэд хэдэн компанийн хувьцаа 6-р сарын 30-ны даваа гарагт эрс унажээ.
Artist Co агентлагийн хувьцаа — тус компанийн гол хувь эзэмшигч нь гол дүрийг бүтээсэн Ли Жон Жэ — 21%-иар унасан байна. Харин кино үйлдвэрлэлийн Artist Studio Inc.-ийн хувьцаа бүр ч 24%-иар буурсан бол визуал эффект хариуцсан Dexter Studios Co-ийн ханш 8.5%-иар доошилжээ.
Амжилттай нээлтийн цаадах үзэгчдийн сэтгэл дундуур байдал
Шүүмжлэгчдийн үзэж буйгаар, цувралын шинэ улирлын төгсгөл нь хүлээлтийг хангаж чадалгүй, үзэгчдийг сэтгэл дундуур үлдээсэн нь энэхүү биржийн хариу үйлдлийн шалтгаан болжээ. “Ихэнх шүүмжүүд цуврал хэрхэн дууссантай холбоотой. Үзэгчдийн төсөөлөл, зохиолын эцсийн үзэл баримтлал хоорондоо зөрсөн нь бухимдал төрүүлсэн,” хэмээн Сөүл хотын поп соёлын шүүмжлэгч Ким Хён-сик тайлбарлав.
Хамгийн их үзсэн ч хөрөнгө оруулагчдад таалагдсангүй
Энэ бүхний хачирхалтай нь, “Тоглоомын хаш” гуравдугаар улирал нээлтээ хиймэгц Netflix-ийн дэлхий дахины топ жагсаалтад тэргүүлж, олон улсад өндөр анхаарал хандуулж буй ч энэ нь компаниудын хувьцаанд эерэг дохио өгсөнгүй.
Цувралын анхны улирал 2021 онд гарч, дэлхийн 142 сая гаруй айл өрх үзсэнээр Netflix-ийн түүхэн дэх хамгийн их үзсэн бүтээл болж, Өмнөд Солонгосын кино, соёлын салбарыг дэлхийд таниулсан түүхтэй.
Гэвч энэ удаа өндөр хүлээлт, өндөр рейтинг хоёр сайн үр дүн авчирсангүй, хөрөнгө оруулагчид ашигт суурилсан хүлээлтээ хангаагүй гэж дүгнэж буй бололтой.
