Өмнөд Солонгосын алдарт жүжигчин Ким Ү Бин, Шин Мин А нарын олон жилийн турш сайн үйлсэд зориулсан нийт хандивын хэмжээ 5 тэрбум воноос давжээ. Арав гаруй жил үерхэж, харилцаагаа хадгалж ирсэн хос зөвхөн уран бүтээлээрээ бус, тогтмол хандив өгдгөөрөө олны талархлыг хүлээдэг.
Тэд саяхан tvN-ийн “You Quiz on the Block” нэвтрүүлэгт оролцох үеэрээ сайн үйлсийнхээ талаар ярьсан байна.
Хөтлөгч Ю Жэ Сок:
“Та хоёрын хандив, өргөл нийлээд 5 тэрбум вон (3,7 сая ам.доллар орчим) боллоо. Ийм сайхан үйлсийнхээ талаар ярьж байх ёстой биш үү”
гэж хэлэхэд Ким Ү Бин, Шин Мин А нар:
“Хандивт мөнгөний хэмжээ гол биш, үнэн сэтгэл, тогтмол өргөж байгаа эсэх чухал”
хэмээн хариулжээ.
Шин Мин А сайн үйлсийг чимээгүй хийхийг илүүд үздэг
Шин Мин А олон нийтэд хандивынхаа талаар байнга мэдээлэхээс илүүтэй тогтмол, чимээгүй туслахыг чухалчилдаг тухайгаа ярьсан байна.
Тэрбээр:
“Сайн үйлсийг чимээгүй, хүнд зарлалгүй хийх ёстой гэж би боддог. Би жил бүр хандив өргөж, хүмүүст туслахыг хичээдэг. Миний хандив юунд зарцуулагдсан, хэнд тус болсон талаар захидал ирнэ. Хэн нэгэнд тус болж, ямар нэг зүйлд хэрэг болсноо мэдэхэд сайхан байдаг. Олны танил хүмүүс бусдад тус болж байх ёстой гэж би үздэг”
гэжээ.
Шин Мин А өмнө нь бага орлоготой өрхүүд, байгалийн гамшигт өртсөн иргэд болон тусламж шаардлагатай бусад хүмүүст тогтмол хандив өгч ирсэн байна.
Хуримынхаа үеэр 300 сая вон хандивлаж байжээ
Ким Ү Бин, Шин Мин А нар сайн үйлсийг хамтдаа үргэлжлүүлж байгаа бөгөөд өнгөрсөн жил хуримын ёслолынхоо үеэр 300 сая воны хандив өргөж байжээ.
Олон жилийн турш тус тусдаа болон хамтран хийсэн хандивуудыг нийлүүлснээр тэдний нийт тусламжийн хэмжээ 5 тэрбум воны босгыг давсан байна.
Хосын хувьд хандивын хэмжээг олон нийтэд харуулахаас илүү тогтмол тусламж үзүүлж, бодит хэрэгцээтэй хүмүүст хүргэх нь хамгийн чухал гэдгийг нэвтрүүлгийн үеэр онцолжээ.
