Монголын хип-хоп уран бүтээлч 113 болон Ginjin нарын хамтран гаргасан “Зуны зугаа” дуу олон нийтийн анхаарлыг татаад байна. Уг бүтээл нь уламжлалт Буриад ардын “Ёохор” дууны агуулга, аялгууг шинэчилж, хип-хоп хэлбэрт оруулсан бөгөөд энэ нь нийгэмд маргаан дэгдээжээ.
Буриадын Төв Холбооноос энэ сарын эхээр уг дуунд албан ёсны мэдэгдэл хүргүүлсэн байна. Тус мэдэгдэлд, “Зуны зугаа” дуу нь:
- Хүүхэд, залуучуудад садар самуун агуулгыг сурталчилсан
- Эмэгтэйчүүдийн эсрэг хүчирхийллийг өдөөн турхирсан
- Ардын “Ёохор” дууг бүдүүлгээр гуйвуулах замаар үндэстний өв соёлыг гутаасан
гэж дүгнэж, уран бүтээлч 113 болон түүний багийг албан ёсоор уучлалт гуйхыг шаардсан юм.
Гэвч реппер 113 энэ шаардлагыг хүлээж авсангүй. Тэрбээр инстаграм хуудсаараа шууд дамжуулалт хийж, “Өөрийн уран бүтээлийг хэн нэгний эрх ашигт нийцүүлэн өөрчлөхгүй” хэмээн мэдэгдсэн. Мөн уучлалт гуйх бодолгүй байгаагаа ил тод хэлсэн байна.
Уг байр суурь нь хип-хоп урлаг дахь үзэл бодлын эрх чөлөө, соёлын өвийн зохистой ашиглалт гэсэн хоёр чиглэлд нийгмийн талцлыг бий болгож байна.
