Ерөнхий сайд Л.Оюун-Эрдэнээс сэтгүүлчид 2025 оны 5-р сарын 14-ний өдөр хүүгийнх нь тансаг хэрэглээтэй холбоотой асуудлаар тодруулга авахыг оролдсон ч тэрбээр ямар ч хариу өгөлгүй, хамгаалагчдаараа халхалж холдсон байна.
Сэтгүүлчдийн асуултаас бултсан нь
Сүүлийн өдрүүдэд Ерөнхий сайдын хүү О.Тэмүүлэн найз охиндоо 20 сая төгрөг бэлэг болгон шилжүүлсэн, брэндийн үнэт эдлэл, хувцас, бүр нисдэг тэрэг ашиглан амралтад явсан гэх мэдээллүүд нийгмийн сүлжээгээр эрчимтэй тарсан. Олон нийтээс Ерөнхий сайд хүүгийнхээ ийм өндөр өртөгтэй хэрэглээний эх үүсвэрийг тайлбарлахыг шаардаж байгаа ч тэрбээр өнөөг хүртэл албан ёсны тайлбар хийгээгүй байна.
Гэвч Гашуунсухайт–Ганцмодын төмөр замын бүтээн байгуулалтын арга хэмжээнд оролцож байсан Ерөнхий сайдыг сэтгүүлчид дахин асуухад, түүний хамгаалагчид замыг хаан сэтгүүлчдийг холдуулсан бөгөөд Засгийн газрын хэвлэлийн алба дараах байдлаар тайлбар өгчээ:
“Ерөнхий сайд бүтээн байгуулалтын ажилд оролцож байгаа тул одоо энэ талаар ярих боломжгүй. Цааш явах ажилтай байна.”
Давтагдсан үйлдэл
Энэ нь анхных биш. Дорноговь аймагт зохион байгуулсан говийн бүсийн чуулганы үеэр ч орон нутгийн сэтгүүлчид уг асуудлыг асуух оролдлого хийсэн ч мөн л хамгаалагчдын дунд орж, асуултаас зайлсхийсэн хэмээн мэдээлэгдэж байна.
Олон нийтийн хүлээлт
Ерөнхий сайдын хувьд улс төрийн хариуцлага, ил тод байдал, шударга ёс ярих дуртай нэгэн. Тиймээс түүний гэр бүлийн гишүүдийн орлого, зарлагын ил тод байдал, иргэдийн өмнө хүлээсэн үүрэгтэй нь хэр нийцэж байгаа талаар олон нийтийн шүүмжлэл нэмэгдсээр байна.
Хэрэв бүх зүйл шударга бол яагаад чимээгүй байх ёстой вэ? Хүмүүс мэдэх эрхтэй
Нөхцөл байдлыг илэн далангүй тайлбарласан нь дээр байх байсан – хардлага багасах байсан