БНСУ-ын эрүүл мэнд, алжаал тайлах аялал жуулчлал, соёлын хөтөлбөрүүдийг нэг дор танилцуулах “KOREA MEDICAL TOURISM ROADSHOW 2026” арга хэмжээ есдүгээр сарын 4-6-ны өдрүүдэд Улаанбаатар болон Өмнөговь аймгийн Даланзадгад хотод зохион байгуулагдана. Тус арга хэмжээг БНСУ-ын Соёл, Спорт, Аялал Жуулчлалын Яамны харьяа БНСУ-ын Аялал Жуулчлалын Төрийн Өмчит Корпорац буюу KTO зохион байгуулж байна.
2025 онд нийт 170 мянга орчим Монгол иргэн БНСУ-ыг зорьсноос 35,586 иргэн эрүүл мэндийн зорилгоор тус улсад очжээ. Энэ нь Монголын иргэдийн дунд БНСУ-ын эмчилгээ, оношилгоо, эрүүл мэндийн үйлчилгээний эрэлт өндөр байгааг харуулж байна.
Энэ хэрэгцээнд тулгуурлан есдүгээр сарын 4-нд Улаанбаатар хотод, есдүгээр сарын 6-нд Даланзадгад хотод БНСУ-ын эрүүл мэндийн аялал жуулчлалын талаар мэдээлэл, зөвлөгөө өгөх тусгай хөтөлбөрүүд зохион байгуулагдах юм. Мөн хоёр улсын эрүүл мэнд, аялал жуулчлалын салбарын байгууллагууд бизнес уулзалт хийж, цаашдын хамтын ажиллагааны боломжуудыг хэлэлцэнэ.
Арга хэмжээний онцлох хөтөлбөрүүд:
- “KOREA MEDICAL TOURISM ROADSHOW 2026” есдүгээр сарын 4-6-нд болно;
- Улаанбаатар болон Даланзадгад хотод зохион байгуулагдана;
- БНСУ-ын эрүүл мэндийн аялал жуулчлалын зөвлөгөө, мэдээлэл өгнө;
- K-Beauty, K-соёл, K-POP хөтөлбөрүүдийг танилцуулна;
- есдүгээр сарын 5-ны 18:00 цагт Сүхбаатарын талбайд “K-WAVE CONCERT” үнэ төлбөргүй тоглолт болно.
Энэ удаагийн арга хэмжээг БНСУ-ын Элчин сайдын яамнаас Монгол Улсад жил бүр зохион байгуулдаг “Солонгосын соёлын өдрүүд” буюу Korea Week-тэй уялдуулж байгаагаараа онцлог. Улмаар есдүгээр сарын 5, 6-нд Сүхбаатарын талбайд илүү өргөн цар хүрээтэй хөтөлбөрүүдийг олон нийтэд хүргэхээр төлөвлөжээ.
Оролцогчид БНСУ-ын аялал жуулчлал, эрүүл мэндийн үйлчилгээний талаар шууд мэдээлэл, зөвлөгөө авахын зэрэгцээ K-Beauty болон K-соёлын төрөл бүрийн хөтөлбөрийг биечлэн туршиж үзэх боломжтой байна. Энэ нь зөвхөн эмчилгээ, оношилгооны мэдээлэл өгөхөөс гадна Солонгосын соёл, гоо сайхан, аяллын чиглэлийг нэг дор танилцуулах арга хэмжээ болох юм.
Мөн есдүгээр сарын 5-ны 18:00 цагаас Сүхбаатарын талбайд болох “K-WAVE CONCERT” үнэ төлбөргүй тоглолтод “Way Back Home” дуугаараа дэлхийд танигдсан DJ, дуучин SHAUN оролцоно. Түүнчлэн BB GIRLS хамтлагийн дуучин Minyoung, Монголын дуучин Ука болон залуу уран бүтээлчид нэгэн тайзнаа чуулж, K-POP болон Монголын орчин үеийн хөгжмийн хосолсон тоглолтыг үзэгчдэд хүргэхээр байна.
Ийнхүү “KOREA MEDICAL TOURISM ROADSHOW 2026” нь БНСУ-ын эрүүл мэндийн аялал жуулчлалын боломж, K-Beauty, K-соёл, хөгжмийн хөтөлбөрүүдийг Монголын иргэдэд нэг дор танилцуулах өргөн хүрээтэй арга хэмжээ болохоор байна.
