Буриадын Дуурь, бүжгийн академик театрын шилдэг уран бүтээлчид Монгол Улсад айлчилж, Жорж Бизегийн алдарт “Кармен” дуурийг толилуулахын зэрэгцээ гала тоглолт зохион байгуулна. Уг уран бүтээлийн тоглолтууд Улаанбаатар хотын Дуурь, бүжгийн академик театрын тайзнаа энэ долоо хоногт болно.
Кармен ба гала тоглолт
- 4-р сарын 25-нд монголын үзэгчид франц хөгжмийн зохиолч Жорж Бизегийн “Кармен” дуурийг үзэх боломжтой.
- 4-р сарын 27-нд буюу ням гарагт Буриадын уран бүтээлчид гала тоглолт хийж, дэлхийн сонгодог хөгжмийн сор бүтээлүүдийг хүргэнэ.
Тоглолтын бүрэлдэхүүнд 20 уран бүтээлч багтсан ба тэдний дунд ОХУ-ын Гавьяат жүжигчин Билигма Ринчинова, Буриадын Ардын жүжигчид Намхай Мунхзул, Эдуард Жагбаев, Ольга Жигмитова болон нэр хүндтэй уран бүтээлчид оролцож байна.
Гала тоглолтын хөтөлбөрт Ж.Бизе, Ж.Пуччини, Ж.Верди, Ж.Россини, И.Штраус, П.Чайковский, А.Моцарт, Г.Доницетти, А.Каталани зэрэг дэлхийн алдартай хөгжмийн зохиолчдын бүтээлүүдээс сонгож оруулжээ.
Уран бүтээлийн харилцаа гүнзгийрч байна
Буриадын дуурь бүжгийн театр нь анх 1939 онд Буриадын драмын театрыг шинэчилж байгуулагдсан бол, 1949 онд одоогийн бүтэцтэйгээр дуурь бүжгийн театр болон бүрэн төлөвшсөн.
Энэхүү айлчлал нь Монгол-Буриадын соёл, урлагийн хамтын ажиллагааг гүнзгийрүүлж буй жишээний нэг юм. 2025 оны 6-р сард хоёр улсын уран бүтээлчид хамтран П.Чайковскийн “Хунт нуур” балетыг тайзнаа амилуулах бол, үүний өмнө 4-р сарын 3-4-нд Монголын Дуурь, бүжгийн театрын 110 уран бүтээлч Буриадад айлчилж, Ж.Вердигийн “Аида” дуурь болон гала тоглолт үзүүлээд амжсан.
