Сэлэнгэ аймгийн Шаамар сумын Охь хөндий 2 дугаар багийн нутаг дэвсгэрт харамсалтай осол гарчээ. Тодруулбал, “Нүхэн гүүр” гэх газрын орчимд голын усаар урсаж байсан бөмбөгийг гаргаж авахаар усанд орсон 22 настай, иргэн Д живж амь насаа алдсан байна.
Сэлэнгэ аймгийн Онцгой байдлын газарт энэхүү дуудлага мэдээлэл 2026.07.12-ны өдрийн 17:53 цагт иржээ. Хүлээн авсан даруйдаа тус газрын Эрэн хайх, аврах ангийн бүрэлдэхүүн Орхон голын дагуу эрлийн ажлыг шуурхай эхлүүлсэн байна. Алба хаагчид аврах завь, дрон буюу нисгэгчгүй нисэх төхөөрөмж болон бусад шаардлагатай техник, багаж хэрэгслийг дайчлан цаг алдалгүй, тасралтгүй хайлт хийжээ.
Олон хоногийн эрлийн үр дүнд хохирогчийн цогцсыг 2026.07.17-ны өдрийн 14:57 цагт олсон байна. Аврагчид талийгаачийг анх осолдсон цэгээс доош 20 км-ийн зайд орших Орхон голын “5 салаа” гэх газраас гаргаж авчээ. Үүний дараа хэргийг шалгуулахаар холбогдох хууль хяналтын байгууллагынханд хүлээлгэн өгсөн байна.
Дээрх харамсалтай үйл явдалтай холбогдуулан Сэлэнгэ аймгийн онцгой байдлын газраас иргэдэд хандан онцгой сэрэмжлүүлэг гаргалаа. Амралт, аяллын улирал үргэлжилж буй энэ үед та бүхэн өөрийн болон дотны хүмүүсийнхээ аюулгүй байдлыг хангах үүднээс дараах дүрмийг чанд мөрдөнө үү.
- Усанд хөвж буй элдэв эд зүйл, тоглоомыг авахаар гол руу дур мэдэн орохгүй байх;
- Голын гүн, урсгалын хурд, ёроолын нөхцөл байдлыг мэдэхгүй бол усанд орохоос татгалзах;
- Бага насны хүүхдийг гол усны ойролцоо хараа хяналтгүйгээр огт үлдээхгүй байх;
- Согтууруулах ундааны зүйл хэрэглэсэн үедээ усанд орохоос хатуу татгалзах.
Таны сонор сэрэмж, болгоомжлол учирч болох бүх төрлийн эрсдэлээс амь насыг тань хамгаална. Тиймээс иргэд та бүхнийг гол усны аюулаас урьдчилан сэргийлж, хариуцлагатай аялахыг уриалж байна.
