Бүгд Найрамдах Болгар Улсын Ерөнхийлөгчийн ивээл дор жил бүр зохиогддог олон улсын “Алтан Феми” кино наадмаас Монголын уран бүтээлчид таван “Алтан цом”-ыг хүртсэн байна.
Наадмын тухай
Уран сайхны болон баримтат кино бүтээгчдийг нэгтгэх, соёлын солилцоог өргөжүүлэх зорилгоор 2023 онд анх удаа зохион байгуулагдсан.
2026 оны шагнал гардуулах ёслол зургаадугаар сарын 6-ны өдөр Софи хотод явагдсан. Энэ жилийн наадам хөгжлийн бэрхшээлтэй хүмүүст зориг өгөх түүх, экологи, байгаль орчны хамгаалал, аутизмтай хүүхдүүдийн нийгмийн оролцоо, тэдний тулгамдсан асуудал, эмэгтэйчүүдийн хүчирхийллээс урьдчилан сэргийлэх, тэмцэх зэрэг сэдвийг хамарсан юм.
Монголын амжилт
Болгар дахь Монгол Улсын Элчин сайдын яам Гадаад харилцааны яамаар дамжуулан уран бүтээлчдэд урилга илгээснээр найман бүтээл ирүүлжээ. Үүнээс тав нь шалгарч, “Алтан цом”-д хүрэв. Эдгээрт найруулагч Э.Ган-Очирын “Их говийн манаач”, О.Урантуяагийн “Явуулын хүн Говьд”, Т.Алтантуяагийн “Хөх тавилан”, Г.Бямбасүрэнгийн “Хувь заяа”, Д.Галбаярын “Эмэгтэйн кейс” кинонууд багтсан.
Дэлхийн 130 орны 9600 уран бүтээлч өрсөлдсөнөөс манай таван бүтээл төрөл тус бүрт шагнал хүртсэн нь улс орны нэр хүндийг өндөрт өргөсөн бахархалтай үйл явдал боллоо.
Шагнал гардуулах ёслол
“Их говийн манаач” баримтат киноны продюсер Ж.Мядагбадам, зураглаач С.Боргил, “Явуулын хүн говьд” уран сайхны киноны найруулагч О.Урантуяа, продюсер, жүжигчин Д.Урантунгалаг, гүйцэтгэх продюсер О.Уянга нар Монголоос ёслолд оролцож, шагналаа гардан авсан байна.
Харин найруулагч Т.Алтантуяагийн “Хөх тавилан”, Г.Бямбасүрэнгийн “Хувь заяа”, Д.Галбаярын “Эмэгтэйн кейс” киноны “Алтан цом”-ыг Монгол Улсаас Болгар Улсад суугаа Элчин сайд Л.Саянаа уран бүтээлчдийн нэрийн өмнөөс хүлээн авчээ.
Бусад орны амжилт
“Алтан Феми” наадмаас Польш Улс хоёр, Мороко хоёр, Кипр хоёр, Индонези хоёр, Вьетнам нэг, Ливан нэг, Аргентин нэг, Армен нэг “Алтан цом”-ыг тус тус авсан.
Тоглолт
“Явуулын хүн говьд” киноны гол дүрд Үндэсний урлагийн их театрын жүжигчин, уртын дуучин Д.Урантунгалаг тоглосон бөгөөд шагнал гардуулах ёслолд тэрээр уг киноны дуу болох “Алсын говь” уртын дууг дуулж оролцогчдын сэтгэлийг татжээ.
