“OpenAI” компанийн бүтээсэн “ChatGPT” аппликейшн дэлхий даяар сар бүр тогтмол ашигладаг (идэвхтэй) хэрэглэгчдийнхээ тоогоор 1 тэрбумын хязгаарыг давжээ. Энэ нь хүн төрөлхтний түүхэнд хамгийн богино хугацаанд тус босгонд хүрсэн аппликейшн болж буйг “Sensor Tower” судалгааны компанийн тайланд дурдсан байна.
“ChatGPT” нь зах зээлд нээлтээ хийснээсээ хойш ойролцоогоор гурван жилийн хугацаанд 1 тэрбум хэрэглэгчтэй болсон бөгөөд энэхүү өсөлтийн хурдаараа “Google Maps”, “TikTok”, “Instagram”, “YouTube” зэрэг алдартай платформуудыг ардаа орхижээ.
“Claude” аппликейшн хүчтэй өрсөлдөөн үзүүлж байна
Түүнчлэн судалгаанаас үзэхэд, 2026 оны нэгдүгээр улиралд “Anthropic” компанийн “Claude” аппликейшнийг утсандаа суулгасан АНУ-ын хэрэглэгчид үүнээс нэг сарын дараа “ChatGPT”-д зарцуулах хугацаагаа өмнөх найман сарын дундажтай харьцуулахад 5 хувиар бууруулсан байна.
Өнгөрсөн даваа гарагт “Anthropic” компания АНУ-д хувьцаагаа олон нийтэд нээлттэй худалдаалах (IPO) өргөдлөө нууцаар гаргасан бөгөөд “OpenAI” компани ч мөн ирэх долоо хоногуудад IPO гаргахаар бэлтгэж байгааг “Reuters” агентлаг мэдээллээ.
“Sensor Tower”-ийн мэдээлснээр, одоогийн хоёрдугаар улирлын байдлаар “Claude” аппликейшн дэлхий даяар сар бүр 56 сая идэвхтэй хэрэглэгчтэй болоод байна. Тус аппликейшний идэвхтэй хэрэглэгчдийн тоо жилийн дүнгээр ойролцоогоор 640 хувиар өссөн нь “ChatGPT”-ийн өсөлтөөс (62 хувь) хавьгүй өндөр үзүүлэлт юм.
