Монгол Улсын гавьяат тамирчин, боксчин М.Нандинцэцэг АНУ-ын Олимпын боксын спорт дахь хамгийн нэр хүндтэй тэмцээнд түрүүлж, алтан медалийн эзэн боллоо. Оклахома мужийн Тулса хотноо зохион байгуулагдсан тус нэр хүндтэй “GOLDEN GLOVES” тэмцээний эмэгтэйчүүдийн 54 кг-ийн жинд тэрбээр шилдэг нь гэдгээ батлан харуулсан байна. Өдгөө АНУ-д суурьшин амьдарч буй манай тамирчин энэхүү тэмцээнд өөрийн оршин суугаа бүс нутгийг төлөөлөн амжилттай оролцжээ.
Тэрбээр тэмцээний явцад дараах мужуудыг нэгтгэсэн бүсийг төлөөлж, бусад мужийн шилдэг боксчидтой тулалдсан байна. Түүний төлөөлсөн АНУ-ын бүс нутагт дараах газрууд багтжээ:
- Виржиниа
- Норт Каролина
- Вашингтон DC
- Делавэр
- Мэрилэнд Эдгээр бүс нутгийн тамирчдыг тэргүүлэн рингэнд гарсан нь түүний хувьд шинэ сорилт байлаа.
Түүхэн ялалт байгуулсныхаа дараа М.Нандинцэцэг сэтгэгдлээ өөрийн цахим хуудаснаа хуваалцсан юм. Тэрбээр “Миний хувьд эхлээд “Хар Чоно” клуб, дараа нь Орхон аймаг, Эрдэнэт үйлдвэр болон Монгол Улсаа төлөөлж тулалдаж байсан бол энэ удаа АНУ-ын Виржиниа, Норт Каролина, Вашингтон DC, Делавэр, Мэрилэнд бүсийг төлөөлөн бусад мужийн тамирчидтай тулалдахаар боллоо. Амьдралд тохиож буй бас нэгэн сайхан мөч, мартагдашгүй дурсамж мэт санагдаж байна” хэмээн онцлон тэмдэглэжээ. Түүний гаргасан энэхүү амжилт нь Монголын боксын спортын түүхэнд шинэ нэгэн хуудсыг нэмж байна.
