НҮБ-ын Хүнс, хөдөө аж ахуйн байгууллагаас хэрэгжүүлж буй TCP/MON/4003 “Шинээр байгуулагдсан Ургамал хамгааллын агентлагийг чадавхыг сайжруулах” техник хамтын ажиллагааны хөтөлбөрийн хүрээнд манай улсын газар тариалангийн салбарт томоохон дэмжлэг үзүүллээ. Тодруулбал, талбайн хөнөөлт организмтай тэмцэх зориулалт бүхий дроныг тус агентлагт хүлээлгэн өгсөн байна. Технологийн энэхүү шинэчлэл нь тариалалтын явцад учирч болох эрсдэлийг бууруулах, голомтыг шуурхай устгахад чухал ач холбогдолтой юм.
Орчин үеийн дэвшилтэт техникийг үйлдвэрлэлд нэвтрүүлснээр газар тариалангийн салбарт хэд хэдэн давуу тал бий болж байна. Дроныг ашигласнаар хүн хүч хэмнэхээс гадна эдийн засгийн өндөр үр ашиг хүртэх боломж бүрдэж байгааг мэргэжилтнүүд онцоллоо. Түүнчлэн ургамал болон хөрсний үржил шимийг хамгаалах үйл ажиллагаанд хяналт тавих, шинжлэх ухаанд суурилсан оновчтой шийдвэр гаргахад энэхүү технологи гол үүрэг гүйцэтгэнэ.
Технологийн давуу талуудаас дурдвал:
- Хөнөөлт организмын тархалтын голомтыг шуурхай илрүүлж, устгах.
- Талбайн хяналтын үйл ажиллагаанд зарцуулах хүн хүч, зардлыг хэмнэх.
- Хөрсний үржил шим болон ургамал хамгаалалд шинжлэх ухааны үндэслэлтэй хяналт тогтоох.
Үүнтэй холбогдуулан дроныг ашиглах заавар, техникийн зөвлөгөө өгөх сургалтыг нийлүүлэгч байгууллагаас өнөөдөр зохион байгуулж байна. Тус сургалтад Ургамал хамгааллын газар, Ургамал, газар тариалангийн эрдэм шинжилгээний хүрээлэн болон гурван аймгийн Хүнс, хөдөө аж ахуйн газрын мэргэжилтнүүд хамрагдаж, онол практикийн мэдлэгээ дээшлүүлж байгаа юм. Шинэ агентлагийн чадавхыг бэхжүүлснээр ургац алдах эрсдэлээс урьдчилан сэргийлэх тогтолцоо улам боловсронгуй болно.
