Японы Засгийн газрын тэргүүнээр томилогдоод зургаан сарын нүүрийг үзэж буй Такаичи Санаэ амралт, нойр дутагдаж байгаадаа гомдоллох болжээ. Тус улсын түүхэн дэх анхны эмэгтэй Ерөнхий сайд тэрбээр өөрт тулгараад буй хүндрэлүүдийн талаар Худалдааны сайд асан Амари Акирад хуваалцсан тухай “Japan Today” агентлаг уламжлав. Тэрбээр албан тушаалаа хүлээн авахдаа “Ажиллаж, ажиллаж, ажиллаж, ажиллаж бас дахин ажиллана” хэмээн амлаж байсан ч энэхүү хатуу дэглэм нь түүнийг өдөрт ердөө хоёроос дөрвөн цаг л унтдаг болоход хүргэсэн байна.
Энэхүү хэт ачаалалтай ажиллах арга барил нь ажил, амьдралын тэнцвэрийг эрхэмлэдэг болсон орчин үеийн Японы нийгмийн хандлагаас хоцрогдсон үйлдэл хэмээн зарим шинжээчид шүүмжлэх болсон юм. Санаэ энэ сарын эхээр парламентын хорооны хуралдаанд оролцохдоо төрийн хүнд ачааны хажуугаар гэрийн ажил амжуулсаар байгаад амарч чаддаггүйгээ ний нуугүй ярьжээ.
Төрийн тэргүүний өдөр тутмын амьдралд тулгарч буй зарим сонирхолтой бэрхшээлүүдийг дурдвал:
- Ерөнхий сайдын өргөө рүү гаднаас бэлэн хоол захиалж хүргүүлэх боломжгүй байдаг;
- Аюулгүй байдлын үүднээс ганцаараа дэлгүүр хэсэж хүнс цуглуулах боломж хязгаарлагдмал;
- Хөлдөөсөн хоолны нөөц нь дууссан үед хоол ундны асуудал нэн хүндрэлтэй болдог;
- Албаны ажил дуусаад гэртээ харьсан ч гэр бүлийн хүнс, ахуйн ажлаа өөрөө амжуулдаг.
Тэрбээр нөхөртэйгөө хамт Ерөнхий сайдын албан ёсны өргөө рүү нүүж орсноос хойш ийнхүү ахуйн шинжтэй асуудлуудтай нүүр тулах болжээ. Төрийн өндөр албан тушаалыг гүйцэтгэхийн зэрэгцээ хувийн амьдралын энгийн хэрэгцээгээ хангаж, амарч тухлах нь түүний хувьд хамгийн том сорилт болоод байгааг Такаичи Санаэ онцолсон байна.
