Монгол Улсын гарьд Н.Өсөхбаярын допингийн асуудалтай холбоотой маргааныг хэлэлцэх шүүх хуралдааны тов тодорхой боллоо. Өмнө нь энэ сарын 09-ний өдөр /2026.04.09/ болохоор товлогдсон байсан ч тодорхой шалтгааны улмаас хойшлогдоод байсан уг хуралдаан ирэх баасан гараг буюу дөрөвдүгээр сарын 24-ний өдөр болохоор шилжсэн байна.
Сүхбаатар аймгийн Онгон сумын харьяат Н.Өсөхбаяр нь өнгөрсөн жилийн Үндэсний их баяр наадмаар найм даван үзүүрлэж, Улсын гарьд цол хүртсэн билээ. Гэвч баяр наадмын дараах шинжилгээгээр түүнээс хориотой бодис илэрсэн тул холбогдох байгууллагуудаас түүний цолыг хураах, барилдах эрхийг нь гурван жилийн хугацаагаар түдгэлзүүлэх саналыг гаргасан юм.
Үндэсний спортын арбитрт гаргасан түүний гомдлын дагуу дараах талууд оролцсон хуралдаан болно:
- “Монголын үндэсний допингийн эсрэг байгууллага” НҮТББ;
- Үндэсний их баяр наадмыг зохион байгуулах хороо;
- Үндэсний их баяр наадмын Бөхийн салбар хороо;
- Бөхийн салбар хорооны дэргэдэх Үр дүнгийн удирдлагын баг.
Тамирчин Н.Өсөхбаяр өөрт нь ногдуулсан дээрх шийдвэрүүдийг эс зөвшөөрч, өөрийн эрх ашгаа хамгаалахаар Арбитраар гомдол гаргаад байгаа нь энэ юм. Олон нийтийн анхаарлын төвд байгаа тус хуралдааны шийдвэр хэрхэн гарах талаар бид эргэн мэдээлэх болно.
