Нийслэл хотод энэ жил авто замын таван байршилд засвар, шинэчлэлийн ажил хийхээр төлөвлөсөн байна. Ингэснээр түгжрэл ихтэй болон ашиглалтын ачаалал өндөртэй хэд хэдэн гол чиглэлийн замыг үе шаттайгаар шинэчлэхээр болжээ.
Тодруулбал, Саппорогийн уулзвараас Таван шарын уулзвар хүртэлх зургаан эгнээ бүхий 3.5 км урт авто зам, Дамбадаржаагийн эцсээс Бэлхийн зам хүртэлх 4.6 км зам, Санзайн 1.7 км, Сэлхийн 4.3 км, мөн Монелоос Дарь-Эхийн зам хүртэлх 6 км урт авто замыг шинэчлэхээр төлөвлөсөн байна.
Одоогийн байдлаар Бэлх болон Сэлхийн чиглэлийн авто замын ажлын тендерийг аль хэдийн зарласан бол Энхтайваны өргөн чөлөө дагуух Саппорогийн уулзвараас Таван шарын уулзвар хүртэлх зам, мөн Монелийн чиглэлийн авто замын тендерийг ойрын хугацаанд зарлахаар бэлтгэж байгаа аж.
Ингэснээр нийслэлийн авто замын сүлжээг сайжруулах хүрээнд хөдөлгөөний ачаалал ихтэй гол чиглэлүүдэд засвар, шинэчлэлийн ажлыг шат дараатай хэрэгжүүлэх ажил эхлэхээр байна.
