Улаанбаатар хотын авто замын түгжрэлийг бууруулах, төмөр замаар тусгаарлагдсан авто замын сүлжээний холболтыг сайжруулах зорилгоор нийслэлийн гурван стратеги байршилд нүхэн гарц барих бүтээн байгуулалтын ажил үе шаттайгаар явагдаж байна. Эдгээр төслүүд бүрэн ашиглалтад орсноор төмөр замын гарам хаагдах үед үүсдэг саатлыг арилгаж, баруун бүсийн замын ачааллыг багасгахад томоохон түлхэц болох юм.
Нүхэн гарцуудын барилга угсралтын явц
Төслийн талбар дахь бүтээн байгуулалтын ажлууд өөр өөр хувьтайгаар үргэлжилж байгаа бөгөөд байршил тус бүрийн гүйцэтгэл дараах байдалтай байна:
- Таван шарын нүхэн гарц: Сонгинохайрхан дүүргийн 20 дугаар хороонд баригдаж буй уг байршлын ажил 96 хувийн гүйцэтгэлтэй байна. Төслийн хүрээнд явган хүний болон дугуйн замыг бүрэн засаж дуусгасан бөгөөд дээгүүр нь өнгөрөх 90 метр урттай явган хүний гүүрийн суурийн ажлыг хийж, одоогоор металл хийцийг угсрахад бэлтгэж байна. Энэхүү байгууламж нь Найрамдлын замыг Товчооны замтай шууд холбох ач холбогдолтой.
- Геологийн төв лаборатори орчмын нүхэн гарц: Баянгол дүүргийн 20 дугаар хорооны нутаг дэвсгэрт хийгдэж буй ажил 39 хувийн биелэлттэй үргэлжилж байна. Үйлдвэрчний эвлэлийн гудамжийг Эрчим хүчний гудамжтай холбох уг төсөлд 28 метр урт, 5 метр өндөртэй туннель, 1.48 км урттай авто зам болон явган, дугуйн зам цогцоор баригдах бөгөөд хоногт 27.5 мянган автомашин нэвтрүүлэх чадалтай болох юм.
- “Гермес” худалдааны төвийн урд талын нүхэн гарц: Баянгол дүүргийн 4 дүгээр хороонд хэрэгжиж буй уг бүтээн байгуулалт 68 хувийн гүйцэтгэлтэй явагдаж байна. Нарны замыг Тээвэрчдийн гудамжтай холбох тус гарцын хувьд төмөр бетон байгууламжийг төмөр замын доогуур түлхэж суурилуулах “box jacking” технологийн үндсэн ажлыг бүрэн дуусгаж, одоогоор инженерийн шугам сүлжээ, авто зам болон тохижилтын ажлыг гүйцэтгэж байна.
Нийслэл хотод төмөр замын гармууд хаагдах тоолонд үүсдэг замын саатал нь иргэдийн цаг завыг барах ба авто замын ачааллыг эрс нэмэгдүүлдэг. Шинээр ашиглалтад орох эдгээр байгууламжууд нь замын хөдөлгөөний саатлыг арилгахаас гадна автомашин, явган зорчигч болон дугуйтай иргэдийн аюулгүй зорчих нөхцөлийг бүрэн хангах ач холбогдолтой юм.
