Олон улсын тэшүүрийн холбоо (ISU – International Skating Union) ОХУ-ын уран гулгагч Камила Валиева, Марк Кондратюк болон мөсний бүжгийн хос Александра Степанова, Иван Букин нарыг олон улсын тэмцээнд оролцуулахгүй байх шийдвэр гаргажээ.
Камила Валиева допингийн хэрэгтэй холбоотой дөрвөн жилийн эрх хасах шийтгэлээ дуусгаад энэ жил их спортод эргэн ирсэн юм. Гэвч ISU түүнийг олон улсын тэмцээнд оролцох боломжгүй гэж үзсэн байна.
Холбооноос Валиевагийн олон нийтийн сүлжээн дэх үйл ажиллагаа болон хэвлэлд гарсан мэдээллүүдийг шалгасны үндсэн дээр Украины дайныг дэмждэг гэсэн дүгнэлтэд хүрсэн гэж мэдээлжээ. Тухайлбал, түүнийг ОХУ-ын Ерөнхийлөгч Владимир Путинтэй хамт зураг авхуулж, Засгийн газраас зохион байгуулсан арга хэмжээнүүдэд тогтмол оролцдог хэмээн дурдсан байна.
ISU-ийн шийдвэрт хамрагдсан Камила Валиева, Марк Кондратюк, Александра Степанова, Иван Букин нар Спортын арбитрын шүүхэд гомдол гаргахаар болжээ.
