“Marvel” студийн 2012 оны The Avengers буюу “Өшөө авагчид” кинонд Тони Старкийн унаж гардаг “Acura NSX Roadster” автомашиныг дуудлага худалдаанд оруулжээ. Ингэснээр кино болон супер баатруудын ертөнцийн шүтэн бишрэгчид дэлгэцийн түүхтэй шууд холбоотой ховор эд зүйлийг эзэмших боломжтой болж байна.
Киноны зураг авалтад зориулан тусгайлан бүтээсэн уг автомашиныг “Cars & Bids” цахим дуудлага худалдааны платформоор худалдах юм. “Acura” компанийн мэдээлснээр үнэ хаялцуулах ажиллагаа аравдугаар сарын 31-ний өдрийн 14:00 цагт Номхон далайн цагаар хаагдана.
Анхны NSX дээр суурилж, гар аргаар бүтээжээ
Энэхүү өвөрмөц автомашиныг Лос-Анжелес дахь “Acura”-гийн загвар зохион бүтээх студид хийсэн байна.
Машины суурь хэсэгт 1991 онд танилцуулагдсан анхны “NSX” загварыг ашигласан бол гадна их биеийн дизайныг хоёр дахь үеийн “NSX Concept”-оос санаа авч, гар аргаар бүтээжээ.
Тони Старкийн кинон дээр ашигласан “STARK 33” дугаар ч автомашин дээрээ хэвээр үлдсэн байна.
Улаан өнгийн, дээвэр нь нээгддэг уг “Acura NSX Roadster” нь гадна төрхөөрөө кинонд гарсан хувилбартайгаа ижил хэвээр байгаа аж.
Лас-Вегасын үзэсгэлэнд олон нийтэд үзүүлнэ
Автомашиныг аравдугаар сарын 31-нд Лас-Вегаст зохион байгуулагдах “Concours” автомашины үзэсгэлэнд дэлгэн үзүүлэхээр төлөвлөжээ.
Ингэснээр дуудлага худалдаа дуусахаас өмнө сонирхогчид машиныг бодитоор үзэх боломжтой болох юм.
Энэхүү “Acura NSX” нь киноны зураг авалтын эд хэрэглэл төдийгүй үйлдвэрлэгчийн туршилтын загвар учраас ердийн автомашин шиг улсын бүртгэлд бүртгүүлэх боломжгүй байна.
Дуудлага худалдааны мэдээлэлд дурдсанаар уг машиныг нийтийн эзэмшлийн зам дээр жолоодохыг зөвшөөрөхгүй.
Орлогыг буяны ажилд зориулна
Дуудлага худалдаанаас орж ирэх орлогыг худалдагч болон худалдан авагч хоёр харилцан тохиролцож сонгосон буяны байгууллагад хандивлах юм байна.
Мөн “Acura” компани тус дуудлага худалдаатай холбоотойгоор бие даасан уран бүтээлчид болон залуу авьяастнуудыг дэмжих зорилгоор “Sundance Institute”-д хандив өгөхөөр болжээ.
Ийнхүү Тони Старкийн дүртэй холбоотой хамгийн танигдсан автомашинуудын нэг болох “Acura NSX Roadster” киноны дурсгалт эд зүйлээс хувийн цуглуулгын ховор бүтээл болох шинэ замналаа эхлүүлэхээр байна.
