ОХУ-ын Хиагт хот 2027 онд тохиох түүхт 300 жилийн ойдоо бэлтгэж байна. Энэхүү түүхэн тэмдэглэлт ойг тохиолдуулан Монгол Улсын талаас Ардын хувьсгалын удирдагч, жанжин Дамдины Сүхбаатарын хөшөөг Хиагт хотод босгож, бэлэглэхээр шийдвэрлэжээ. Хоёрдугаар сарын 4-ний өдөр болсон албаны уулзалтаар хөшөө босгох байршил болон дагалдах түүхэн дурсгалуудыг сэргээх ажлыг эцэслэн тохиролцсон байна.
Хөшөөг Хиагтын түүхэн Слобода дүүрэгт байрлуулахаар тогтсон нь Монгол, Оросын хувьсгалт тэмцлийн түүхэн холбоог илэрхийлж буй хэрэг юм. Хөшөөг бүтээх архитектороор С.Батболд ажиллаж байгаа бөгөөд төслийн явцтай Хил хамгаалах ерөнхий газрын дарга асан, генерал Я.Пүрэвдорж болон Хиагт хотын захиргааны тэргүүн Андрей Фомин нар биечлэн танилцжээ.
Төслийн хүрээнд хийгдэх үндсэн ажлууд:
- Жанжин Д.Сүхбаатарын морьт хөшөөг шинээр бүтээж, түүхэн дүүрэгт сүндэрлүүлэх.
- Хиагт хотыг Д.Сүхбаатарын одонгоор шагнасан тухай дурсгалын самбарыг иж бүрэн засварлан шинэчлэх.
- Орон нутгийн музей болон Д.Сүхбаатарын гэр музейн хадгалалт, хамгаалалтыг сайжруулахад хамтран ажиллах.
Манай төлөөлөгчид айлчлалын үеэр Хиагт дахь түүхэн дурсгалуудыг үзэж сонирхсон бөгөөд энэхүү хөшөө нь хоёр орны найрамдалт харилцааны шинэ бэлгэ тэмдэг болно гэдэгт итгэлтэй байгаагаа илэрхийллээ.
