Италийн төдийгүй дэлхийн тансаг зэрэглэлийн хувцас загварын томоохон төлөөлөгч Валентино Гаравани 93 насандаа ертөнцийн мөнх бусыг үзүүллээ. Тэрээр 2026 оны нэгдүгээр сарын 19-ний даваа гарагт Ром хот дахь өөрийн гэртээ гэр бүл, дотны хүмүүсийнхээ хүрээлэлд амар амгалан нүд анисан болохыг түүний нэрэмжит сангаас албан ёсоор мэдэгдсэн байна. Дэлхийн хамгийн үзэсгэлэнтэй бүсгүйчүүдийг өөрийн урласан чамин даашинзаараа гоёж ирсэн түүний орон зай загварын ертөнцөд нөхөж баршгүй гарз боллоо.
Валентино 1932 онд Италийн Вогера хотод мэндэлсэн бөгөөд загварын боловсролыг Парист эзэмшсэнийхээ дараа 1959 онд Ромд өөрийн нэрийн брэндийг үүсгэн байгуулжээ. Түүний амжилтад бизнес болон амьдралын хамтрагч Жианкарло Жиамметти үнэлж баршгүй хувь нэмэр оруулж, тэд 1960 онд учирснаас хойш “Valentino” брэндийг дэлхийн хэмжээний эзэнт гүрэн болгож чадсан юм. Ялангуяа “Валентино улаан” хэмээх тод өнгө нь түүний загварын ертөнцөд үлдээсэн арилшгүй гарын үсэг, таних тэмдэг нь болсон билээ.
Түүний ур чадварыг бишрэн шүтдэг үйлчлүүлэгчдийн жагсаалтад дэлхийн хэмжээний одууд болон язгууртнууд багтдаг. Тухайлбал:
- Элизабет Тэйлор: “Клеопатра” киноны зураг авалтын үеэр Валентинотой анх танилцаж, түүний үнэнч нөхөр, үйлчлүүлэгч нь болсон.
- Жаклин Кеннеди: АНУ-ын тэргүүн хатагтай агсан Аристотель Онассистай гэрлэхдээ түүний урласан алдарт цагаан даашинзаар гоёж байв.
- Супер моделиуд: Домогт моделиуд болох Клаудиа Шиффер, Наоми Кэмпбелл нар түүний тайзнаа алхах дуртай байсан бол орчин үед Зендаяа, Гэмма Чан нар түүний загваруудыг сонгосоор байна.
- Язгууртнууд: Бельгийн хатан хаан Паола болон Гүнж Диана зэрэг олон эрхэмсэг хатагтай нар түүний даашинзаар дэгжирхдэг байлаа.
Валентино зөвхөн ажилдаа анхаарахаас гадна тансаг амьдралын хэв маягаараа алдартай нэгэн байсан юм. Тэрээр Парис, Лондон, Нью-Йорк зэрэг дэлхийн томоохон хотуудад өөрийн гэсэн орон сууцтай байснаас гадна Милтон, Монти, Мауди, Маргот, Мэгги, Молли гэсэн зургаан хайртай нохойдоо асар их цаг зав зориулдаг байв. Загварын ертөнцөд өөрийн нэрийг мөнхөлсөн түүний өв соёл ирээдүйн дизайнеруудад үлгэр дуурайл болсоор байх болно.
