Хөвсгөл аймгийн Мөрөн сумын “Сод-Эрдэм” ерөнхий боловсролын сургууль байгуулагдсаны 10 жилийн ой энэ өдрүүдэд тэмдэглэгдэж байна. Аймгийнхаа боловсролын салбарын хамгийн залуу байгууллагын нэг боловч богино хугацаанд олон шилдэг төгсөгч төрүүлсний дундаас Парисын олимпын мөнгөн медальт, Монгол Улсын гавьяат тамирчин Бавуудоржийн Баасанхүү нэрлэгдэх нь гарцаагүй.
Тэрээр сургуулийнхаа ойд зориулан өөртөө хамгийн үнэ цэнтэй дурсгалын нэгээ – дэлхийн аварга болж байхдаа өмссөн кимоногоо “Сод-Эрдэм” сургуульдаа хандивлаж, музейн буланд хадгалуулах болжээ. Ингэснээр ирээдүйн сурагчид олимп, дэлхийн дэвжээнд түрүүлсэн төгсөгчийнхөө жинхэнэ тоног хэрэгслийг үзэж, спортод хичээнгүй хандах урам зориг авах боломжтой болж байна.
Б.Баасанхүүгийн бэлэглэсэн кимоно нь зөвхөн нэг тамирчны амжилтын дурсгал төдийгүй, хөдөө орон нутгийн сургуульдаа буцааж хөрөнгө оруулах, залуу үеэ дэмжих сайхан жишээ болж байгаа хэмээн сургуулийн удирдлагууд хэлжээ.
