Хан-Уул дүүрэгт байрлах “Сансар гарден” цэцэрлэгийн багш хүүхдүүдийг сандалтай нь скочоор хүлсэн гэх ноцтой хэрэг гарч, уг асуудлыг цагдаагийн байгууллагаас албан ёсоор шалгаж эхэлжээ. Энэ талаар Нийслэлийн Засаг даргын орлогч А.Амартүвшин өөрийн цахим хуудсаар мэдээлэл нийтэлсэн байна.
Албаныхны шалгалтын дүн
А.Амартүвшингийн мэдээлснээр, тус хэрэг нь ХУД-ийн 23 дугаар хороо, Арцатын ам, Агарта хотхон дахь 1421 дүгээр байранд үйл ажиллагаа явуулдаг “Сансар гарден” цэцэрлэгт болсон байна. Хэвлэл мэдээлэл болон олон нийтийн сүлжээнд тавигдсан мэдээллийн дагуу шалгалт хийхэд, тухайн үед цэцэрлэг ажиллаагүй, харин гадна хаалганы шил хагарсан, цоожтой байсан аж.
Цэцэрлэг нь хоёр бүлэгтэй, нийт 35 хүүхэдтэй, нэг бүлэгт нэг багш, нэг туслах багш, нэг тогооч ажилладаг бөгөөд эрхлэгч нь жирэмсний амралтаа авч байгаа гэж мэдэгджээ.
Хэргийн илрэл
11 дүгээр сарын 11-ний өдөр цэцэрлэгийн багш нар эцэг эхийн группт тухайн өдрийн хоолны зургийг оруулах үеэр нэг хүүхэд скочоор сандалтайгаа ороосон байдалтай байгааг эцэг эхчүүд анзаарсан байна. Үүний дараа тэд цэцэрлэгийн камерийн бичлэгийг шалгуулж, уг мэдээллийг ХУД-ийн цагдаагийн хэлтэст мэдэгджээ.
Одоогоор цагдаагийн байгууллага камерийн бичлэгийг хураан авч, уг багшийг шалгаж байгаа бөгөөд Боловсролын хяналтын улсын байцаагчийн мэдээлснээр цэцэрлэгийн үйл ажиллагаанд ч мөн хяналт шалгалт үргэлжилж байна.
Албан ёсны байр суурь
А.Амартүвшин дараах байр суурийг илэрхийлжээ: “Шалгалтын ажиллагаа дууссаны дараа цагдаагийн байгууллагаас тухайн багшид хуулийн дагуу хариуцлага тооцно. Мөн цэцэрлэгийн үйл ажиллагаанд холбогдох арга хэмжээ авч, зөрчил гаргасан этгээдийг хариуцлага хүлээлгэнэ. Би өөрөө цэцэрлэгийн насны бяцхан охинтой эцэг хүн. Ийм ёс бус үйлдэлтэй эвлэрч болохгүй. Хариуцлага тооцогдож дуустал анхаарал тавьж ажиллана.”
Хүүхдүүдийн аюулгүй байдал, сэтгэл санааны эрүүл мэндэд ноцтой нөлөө үзүүлж болзошгүй энэхүү хэрэг нийгмийн анхаарлын төвд байна. Албаныхан уг асуудлыг бүрэн шалгаж, холбогдох этгээдүүдэд хуулийн хариуцлага тооцохоо мэдэгдээд байна.
