Хөвсгөл аймгийн Тариалан суманд самарт явж байхдаа сураггүй болсон 46 настай эмэгтэйг 18 хоногийн турш хайсан ч үр дүнд хүрээгүй тул ар гэрийнхнийх нь хүсэлтээр эрлийн ажиллагааг түр зогсоожээ.
Хэргийг тодруулбал, тус сумын нутаг дэвсгэрт дөрвөн хүн самар түүж байх үед иргэн “Э” есдүгээр сарын 21-ний өдрийн 15:00–16:00 цагийн хооронд сураггүй алга болсон байна.
ОБЕГ-ын мэдээлснээр дуудлагыг есдүгээр сарын 22-ны 14:40 цагт хүлээн авч, эрэн хайх ажиллагааг нэн яаралтай эхлүүлсэн. Үүнд Хөвсгөлийн Онцгой байдлын газар, Үндэсний аврах бригад, Хилийн цэргийн 0257-р анги, аймгийн Цагдаагийн газар болон Тариалан, Тосонцэнгэл сумдын мэргэжлийн ангийнхан, ар гэрийнхэн хамтран оролцжээ.
Эрлийн ажиллагаа нийт 18 өдөр үргэлжилсэн ч ямар нэгэн ул мөр илрээгүй тул ар гэрийн хүсэлтээр түр зогсоосон байна.
