Онцгой байдлын ерөнхий газраас мэдээлснээр өчигдөр усны ослын улмаас хоёр иргэн Туул голд амиа алджээ.
Эхний тохиолдол Хан-Уул дүүргийн 8 дугаар хороонд, Сонсголонгийн гүүрний зүүн урд хэсэгт гарсан байна. 19:00 цагийн үед эмэгтэй хүн живсэн тухай дуудлага ирсний дагуу Аврах ангийн алба хаагчид газар дээр нь очиход иргэн О. /нас, хаяг тодорхойгүй/ голын хясааны доор амь насаа алдсан байсныг олж, цогцсыг уснаас гарган Хан-Уул дүүргийн Цагдаагийн хоёрдугаар хэлтэст шилжүүлсэн байна.
Хоёр дахь осол Төв аймгийн Заамар сумын Хайлааст багийн “Шижир алт” орчимд бүртгэгдэв. 17:10 цагт ирсэн дуудлагын дагуу аймгийн Онцгой байдлын газрын алба хаагчид очиход эрэгтэй хүн /нас, овог нэр тодорхойгүй/ голын эргээс 50 метрийн зайд, усанд хайрагдсан байдалтай амь насаа алдсан байжээ. Түүний цогцсыг гарган авч, Цагдаагийн газрын Мөрдөн байцаах тасагт шилжүүлсэн байна.
Албаныхан иргэдийг гол, нуурын орчимд болгоомжтой байж, аюулгүй байдлаа хангахыг анхаарууллаа.
