Хөвсгөл аймгийн ойд сураггүй болсон хоёр настай хүүг олох ажиллагааг өргөтгөж, ОБЕГ-ын харьяа Агаараас эрэн хайх, аврах 111 дүгээр ангийн нисдэг тэрэгтэй аврагчид тус аймагт ажиллаж эхэллээ. Энэ шийдвэрийг Шадар сайд, УОК-ын дарга С.Амарсайхан өгсөн бөгөөд орон нутгийн Онцгой байдлын газар, цагдаа, төрийн байгууллагуудын хүчтэй хамтран ажиллаж байна. Мөн дрон ашиглан уул, ой модтой бартаат газар нутгийг шалган эрлийн ажиллагааг идэвхтэй явуулж байгаа аж.
Хүү алга болсон нөхцөл байдал
2025 оны есдүгээр сарын 17-ны 16:57 цагт Хөвсгөл аймгийн Тариалан сумын Баянхошуу багийн “Сайхан мод” орчмоос дуудлага ирсэн. Мод бэлтгэж байсан иргэд хүүхдээ автомашинд унтуулан орхиод буцаж ирэхэд сураггүй болсон байжээ. Одоогоор аймгийн Онцгой байдлын газар, Цагдаа, Шүүхийн шийдвэр гүйцэтгэх газар, хүүхдийн байгууллагын алба хаагчид болон орон нутгийн иргэд нийлсэн олон хүн тасралтгүй эрлийн ажиллагаанд оролцож байна.
