Засгийн газрын 8-р сарын 20-ны ээлжит хуралдаанаар экспортыг нэмэгдүүлэх арга хэмжээний талаар тогтоол гаргалаа.
Тус тогтоолоор хариуцсан байгууллагуудад фондын биржээр арилжаалагдаж буй нүүрсийг тээвэрлэх тээврийн хэрэгслийн саадгүй үйл ажиллагааг “ухаалаг” гарц бүхий Гашуунсухайтын автоматжуулсан терминалаар хангахыг үүрэг болгосон байна.
Мөн эрчим хүчний нүүрсний биржийн үнийг зах зээлийн индексээр тогтоох, улсын хилээр нэвтрэх бараа, тээврийн хэрэгслийн гаалийн бүрдүүлэлт, хяналтын үйл явцыг цахимжуулахыг даалгав.
Монголын гадаад худалдаанд хамгийн олон мэдээлэл агуулах баримт нь гаалийн мэдүүлэг (116 төрөл), хамгийн цөөн нь улсын бүртгэлийн гэрчилгээ (8 төрөл) байдаг. Экспорт хийхийн тулд 40-өөс дээш баримт бүрдүүлэх шаардлагатай бөгөөд зарим тохиолдолд 6–12 хувийг давхар гаргаж өгдөг.
Эдгээр хүндрэлүүдийг “нэг цонхны” цахим үйлчилгээ нэвтрүүлснээр шийдэхээр төлөвлөж байсан ч санхүүжилтийн дутагдлаас шалтгаалан хэрэгжилт саатжээ. Иймээс санхүүжилтийн асуудлыг яаралтай шийдвэрлэж, худалдан авалтын үйл явцыг эхлүүлэхийг үүрэг болголоо.
Одоогоор уул уурхайн бүтээгдэхүүний дээжийг шинжлэх, дүн гаргах ажиллагаа ихэвчлэн Улаанбаатар дахь Төв лабораторид хийгддэг нь экспортын хурдыг удаашруулдаг. Жишээлбэл, нүүрсний дээж өгснөөс хариу авах хүртэл 7–35 хоног зарцуулдаг. Хэдийгээр Гашуунсухайтын боомт дахь лабораторийн барилга, тоног төхөөрөмж бэлэн болсон ч ашиглалтад ороогүй байна.
🔹 Үүнтэй холбоотойгоор дараах шийдвэрүүдийг гаргав:
- 2025 оны 8-р сар гэхэд нүүрсний дээжийг 48 цагийн дотор шинжилж, дүгнэлт гаргах нөхцөлийг бүрдүүлэх
- 2025 он гэхэд Гашуунсухайтын лабораторийг ашиглалтад оруулах
- 2025 оны 3-р улиралд бусад боомтын лаборатори ашиглалтад орох хүртэл хувийн лабораторийн мэдээллийг гаалийн системд холбох
