68 настай Америкийн дуучин Мадонна ууган охин Лурдес Леондоо 30 насны төрсөн өдрийн мэнд хүргэж, сэтгэл хөдөлгөм нийтлэл оруулжээ.
Лурдес 10-р сарын 14-нд 30 нас хүрсэн бөгөөд энэ өдрийг тохиолдуулан Мадонна Instagram-д охиныхоо амьдралын өөр өөр үеийг харуулсан архивын гэрэл зураг, бичлэгүүдийг нийтэлсэн байна.
Тэдгээрийн дунд Мадонна нярай Лурдесийг хөхүүлж буй ховор зураг ч багтжээ. Дуучин мөн охиныхоо бага нас болон хожуу үеийн гэр бүлийн зургуудыг хуваалцсан байна.
Мадонна мэндчилгээндээ Лурдесийг төрүүлсэн үеийнхээ талаар дурсжээ. Түүний хэлснээр, 18 цаг үргэлжилсэн төрөлтийн дараа хүүхдийн зүрхний цохилт удааширсан тул эмч нар яаралтай кесар хагалгаа хийх шаардлагатай болсон байна.
Тэр үед эмнэлгийн гадна сэтгүүлчдийн зураг авалтын багууд болон нисдэг тэрэгнүүд хүртэл байсан гэж дуучин ярьжээ.
“Төрсөн өдрийн мэнд хүргэе, миний Лолита! Чи надад зүүдэнд минь ирсэн. Амьдрал хэмээх халуурсан зүүдэнд” гэж Мадонна бичсэн байна.
Дуучин тэдний холбоог “библийн” хэмээн тодорхойлж, эх охин хоёрыг нэг зоосны хоёр талтай зүйрлэжээ. Мэндчилгээнийхээ төгсгөлд тэрээр Лурдест өөрийгөө, мөрөөдлөө болон уг гарвалаа хэзээ ч мартахгүй байхыг хүссэн байна.
Лурдес Леон 1996 оны 10-р сарын 14-нд Мадонна, жүжигчин Карлос Леон нарын харилцаанаас төржээ. Өдгөө тэрээр загварын болон хөгжмийн салбарт өөрийн карьераа хөгжүүлж, Lolahol нэрээр уран бүтээл хийж байна. 2022 онд Лурдес анхны синглээ гаргасан бөгөөд 2026 онд ээжтэйгээ хамт шинэ хөгжмийн бүтээл дээр ажиллажээ.
